Мясцовыя «выбары»: шмат алкаголю і пустыя ўчасткі

Беларусы праігнаравалі чарговыя «выбары».

Участак №46 у Першамайскім раёне Віцебска - адзін з нямногіх, дзе ў выбарцаў была альтэрнатыва. Тут балатуюцца чацвёра кандыдатаў у дэпутаты гарсавета, і пяцёра - у дэпутаты абласнога савета. Аднак выбаршчыкі не праяўляюць вялікай актыўнасці, паведамляе «Радыё Свабода».

Участак №46 і яшчэ два суседніх размешчаныя ў віцебскай гімназіі №8. Але ўчора ў гімназічным двары збіраліся купкамі пераважна пенсіянеры. Па крайняй меры, большасць тых, хто ішлі галасаваць - гэта людзі ўжо сталага ўзросту, маладзей сустрэнеш рэдка.

Выключэнні былі хіба толькі тады, калі з гімназіі дасылаюць невядомых «агітатараў», каб прабегліся па бліжэйшых дамах вуліцы Чкалава і нагадалі жыхарам аб галасаванні. Тады на ўчасткі прыходзяць адразу чалавек 5-6 з аднаго пад'езда, распавядае назіральнік Таццяна Севярынец.

«Прыбягае чалавек, абураўся тым, што робіцца - што да яго дадому прыйшлі нейкія людзі, вымушаюць ісці галасаваць. Ну, гэта ўжо, напэўна, бедных настаўнікаў паслалі, даручыўшы кожнаму па пад'ездзу, бо то нікога няма, то адразу па некалькі чалавек з аднаго дома і пад'езда. Яшчэ прыходзіў чалавек, абураны тым, што ў школе прадаецца алкаголь, абураўся, бо тут дзеці - спектакль для выбаршчыкаў, дзіцячы канцэрт - і спіртное побач на разліў. Але Грабоўская, старшыня камісіі і «Чалавек года Віцебска», сказала, што ў яе ёсць дазвол, і што яна «служыць дзяржаве», што яна «дзяржаўны чалавек».

З Таццянай Севярынец давялося мець зносіны за тэрыторыяй школы, бо за ёй на ўчастку асаблівы кантроль, і яна ўжо мела ад камісіі два папярэджанні. За тое, што фатаграфавала падрыхтоўку да продажу алкагольных напояў, і за тое, што крыху перасунула свой стол, каб было лепш відаць працэс галасавання.

Назіральнік кажа, што ёю ўжо палохаюць выбаршчыкаў: калі чалавек прыходзіць, напрыклад, з двума пашпартамі, яму тлумачаць: «Не можам выдаць вам бюлетэні на дваіх, так як у нас назіральнікі». Але не ўсе назіральнікі сочаць за парушэннямі.

Да участку прыпісаныя 2165 выбаршчыкаў. Падчас датэрміновага галасавання ўдзел у выбарах узялі 389 чалавек па падліках назіральнікаў, або 399 па падліках камісіі. Да абеду ў галоўны дзень галасавання прыйшлі яшчэ чалавек пад 400, кажа Таццяна Севярынец. На яе думку, яўка невысокая: наўрад ці будзе больш за 50%.

Кандыдат у «дэпутаты» гарсавета і аблсавета Ірына Яскевіч прыехала на 46 участак, каб на свае вочы паглядзець працэс галасавання. Яна распавяла, што выбаршчыкі яе пазнаюць. «Усміхаюцца, вітаюцца... Але адчуваецца, што ім усё роўна, як галасаваць. Неаднаразова бачыла, як людзі кідаюць бюлетэні ў скрыню, а потым ідуць чытаць біяграфіі кандыдатаў. Гэта нейкі ўласны падыход, ніколі не думала, што такое можа быць», - кажа яна.

Марына Ігараўна, мама дзвюх дачок, прыйшла з дзецьмі проста пагуляць на гімназічны стадыён. На ўчастак для галасавання яна нават не заходзіла:

«Ужо даўно не хаджу на выбары. Лічу, што няма карысці. Вось на прэзідэнцкія - хаджу, каб потым быць упэўненай, што за дзейнага прэзідэнта я не галасавала. Не галасавала я за яго, і ўсё! А мясцовыя выбары - што ад іх залежыць? Таго, каго ім трэба, там абяруць і без мяне».