Уладзімір Іназемцаў: Знаходзячыся 15 гадоў ва ўладзе, захаваць разважнасць немагчыма

Не атрымалася гэта і ў Пуціна.

Der Standard публікуе інтэрв'ю з кіраўніком Цэнтра даследаванняў постіндустрыяльнага грамадства Уладзіславам Іназемцевым. Эксперт ацаніў уведзеныя супраць Расеі санкцыі і выказаў некалькі меркаванняў пра тое, па якім шляху можа пайсці развіццё сітуацыі ва Усходняй Еўропе, піша Inopressa.ru.

На думку Іназемцава, ні ЕЗ, ні ЗША да гэтага часу "не ўвялі сапраўдных санкцый", і гэта можа стаць для Расеі стымулам да таго, каб "ісці далей". Развіваючы сваю думку, ён дадаў, што людзі, якіх закранулі меры ў адказ Захаду, "абсалютна няважныя для Пуціна", яны "ніхто".

"Пасля 15 гадоў ва ўладзе захаваць абачлівасць і разважнасць немагчыма. Не атрымалася гэта і ў Пуціна. Ён верыць у безумоўную важнасць сваёй персоны, у месіянскую місію, - лічыць эксперт. - На працягу 15 гадоў даходы [расейцаў] растуць. Пуцін карыстаецца вялікай папулярнасцю. У апошні год ён шукае ворагаў, якія маглі затармазіць гэты рост. Тады ён будзе казаць, што Захад і міжнародная супольнасць спрабуюць нашкодзіць эканоміцы, а супраць яго самога пратэставаць абсурдна".

"Ёсць два тыпу страт: Крым абыдзецца Расеі прыкладна ў 3,5 млрд еўра ў год. Быццам бы вялікая сума, але для расейскага бюджэту гэта дробязь. Больш сур'ёзная праблема - адток капіталаў і дрэнны інвестыцыйны клімат. Вынікам можа стаць скарачэнне ВУП на 1,5-2%. Калі Захад увядзе [больш дзейсныя] санкцыі, будзе яшчэ горш... Калі Захад не захоча нічога мяняць, можна вярнуцца да ранейшых адносінаў. Рускія будуць задаволеныя. Калі ёсць намер увесці санкцыі, то гэта таксама можна зрабіць. Вынікам, мабыць, стане новая халодная вайна", - сказаў Іназемцаў.

"Самае вялікае пытанне ў тым, ці мае намер Пуцін захапіць Усходнюю Украіну. На дадзены момант яго стратэгія заключаецца ў тым, каб дэстабілізаваць гэтыя вобласці з мэтай не дапусціць правядзення там украінскіх выбараў. У гэтым выпадку ён зможа падвергнуць сур'ёзнаму сумневу легітымнасць новага ўкраінскага ўрада. Калі ён вырашыцца на ўварванне, крызіс будзе доўжыцца некалькі месяцаў. Калі не вырашыцца, то крызіс ўжо ззаду", - мяркуе суразмоўца Der Standard.

"Прапаную еўрапейцам не турбавацца аб расейскай дэмакратыі. Расея вырашыла зараз быць недэмакратычнай, неліберальнай азіяцкай краінай. Іншая справа ўкраінцы: яны ў 2004 годзе зрабілі выбар на карысць еўрапейскай перспектывы, але з боку ЕЗ не было амаль ніякай рэакцыі. Калі Еўразвяз змоўчыць і цяпер, гэта будзе для Расеі знакам, што Еўропа больш не з'яўляецца сілай, гатовай выступаць за дэмакратыю. Але магчымы і іншы сігнал - калі ўкраінцы, так падобныя на рускіх, праз 12-15 гадоў ператворацца ў заможных еўрапейцаў. Ад паспяховасці Украіны ў значнай ступені будзе залежаць будучыня Расеі", - сказаў на заканчэнне Іназемцаў.

Фота: Reuters