Мінэканамразвіцця Расеі: Рост ВУП з-за санкцый зваліцца да нуля

Расею чакае паскарэнне інфляцыі і адток капіталу.

Эканоміка краіны вырасла на 0,3 адсотка ў лютым і ў першым квартале 2014 года апусціцца прыкладна да нуля, сказаў намеснік кіраўніка Мінэканамразвіцця Андрэй Кляпач, назваўшы халоднасць у адносінах з Захадам "істотным негатыўным фактарам для эканамічнага росту", перадае Reuters.

"Вядома, студзень-люты ніжэй тых значэнняў, якія патрэбныя для таго, каб выйсці на параметры прагнозу, якія мы давалі раней (плюс 2,5 адсотка за 2014 год)", - сказаў Кляпач журналістам у панядзелак.

У гадавым і месячным выражэнні рост ВУП у лютым склаў 0,3 адсотка, за першыя два месяцы - 0,2 адсотка.

"Люты нядрэнны, лепш, чым чакалася, але пакуль пра пералом эканамічных тэндэнцый, пра выхад са стагнацыі казаць рана. Гэта ўсё вельмі няўстойлівыя змены", - сказаў намеснік міністра.

Расейскія ўлады разлічвалі, што эканоміка пакажа тэмпы росту ў гэтым годзе на ўзроўні 2,5 адсотка, аднак падзенне інвестыцый у пачатку года і канфлікт ва Украіне звялі прагнозы аналітыкаў на бягучы год да менш чым аднаго адсотку ВУП або нулявых тэмпах росту.

"У першым квартале (рост ВУП будзе) дзесьці нуль. У гадавым вымярэнні будзе крыху больш нуля", - сказаў Кляпач.

У першым квартале 2013 года рост эканомікі складаў 1,6 адсотка, у лютым 2013 года назіралася зніжэнне ВУП на 0,4 адсотка.

"Калі казаць пра санкцыі (Захаду за далучэнне Крыма), то пакуль яны эканамічна яшчэ не носяць значнага характару, але само па сабе астуджэнне адносінаў з'яўляецца істотным негатыўным фактарам для эканамічнага росту і адпаведна праяўляецца і ўплывае на адток капіталу. Ён і да гэтага быў значным. Вядома, павелічэнне напружанасці і астуджэнне адносінаў яго ўзмацняюць", - сказаў Кляпач.

Кляпач сказаў у панядзелак, што адток капіталу ў першым квартале можа скласці "$65-70 мільярдаў, бліжэй да $70 мільярдаў".

За ўвесь 2013 год адток капіталу склаў $62,7 мільярда.

"Па інвестыцыях, на жаль, у першым квартале, мабыць, атрымаем мінус. Інвестыцыі - гэта слабое звяно", - дадаў намеснік міністра.

Мінэканамразвіцця таксама чакае паскарэння інфляцыі ў РФ да 0,9-1,0 адсотка ў сакавіку да лютага, а ў гадавым вымярэнні - да 6,9-7,0 адсоткаў.

Намеснік міністра сказаў, што ўклад паслаблення рубля ў рост спажывецкіх коштаў будзе яшчэ вышэй, чым міністэрства чакала месяц таму. Тады ён ацэньваў гэты ўклад у дадатковыя 0,4-0,5 адсоткавага пункта да прагнозу інфляцыі на год.

"Мы і раней, і цяпер зыходзім з таго, што ўсё ж такі рэцэсіі ў нас няма... Далей, на наш погляд, рэцэсіі не будзе, але ёсць праблема стагнацыі, яе працягласці, глыбіні. На жаль, інвестыцыйны спад працягваецца. Як доўга ён працягнецца, пакуль не гатовы сказаць", - заявіў Кляпач.

Фота: Shutterstock