Масква размяшчае ваенныя базы ў Аргенціне на фоне канфлікту з ЗША

Другая па велічыні краіна ў Паўднёвай Амерыцы пагадзілася размясціць у сябе расейскія ваенныя базы.

Рашэнне прынята ў той момант, калі ўвесь свет зацыклены на падзеях, якія адбываюцца на Украіне, піша "Военное обозрение".

"Згодна з лагічным ланцужком, можна зразумець, што дадзены ход Расейскай Федэрацыі выкліча занепакоенасць у ЗША. Бо Аргенціна і яе блізкі прыхільнік Венесуэла знаходзяцца ў сяброўскіх адносінах з Іранам", - адзначае выданне.

Фармаванне расейскіх баз і павелічэнне расейскай прысутнасці ў заходнім паўшар'і, гаворыцца ў артыкуле, стане няпростай задачай для амерыканскіх уладаў і азначае памяншэнне ўплыву Вашынгтона. "Амерыка ніколі не мела дастатковых СРА ўздоўж яе паўднёвых межаў і не можа годна абараніць іх ад любога ракетнага ўдару", - пазначана ў артыкуле.

Ідэю нарошчвання ваеннай прысутнасці і павелічэння паставак узбраенняў у Лацінскай Амерыцы прэзідэнт РФ Уладзімір Пуцін агучыў міністру абароны Сяргею Шайгу яшчэ ў лютым, піша Liberty Voice.

Выданне прыводзіць дадзеныя справаздач, якія сведчаць аб імкненні Уладзіміра Пуціна стварыць ваенныя базы на Кубе, у Нікарагуа, Венесуэле і Аргентыне, паколькі гэтыя чатыры краіны з'яўляюцца блізкімі партнёрамі Масквы. Эксперты мяркуюць, што ўвага Крамля будзе ў першую чаргу сканцэнтраваная на Нікарагуа, дзе захоўваецца адносна стабільная палітычная і эканамічная абстаноўка. Адзначым, пакуль расейскія дыпламаты не пацвярджаюць дамоўленасць з Нікарагуа.

У любым выпадку, адзначаецца ў артыкуле, з'яўленне расейскіх вайскоўцаў у Паўднёвай Амерыцы дазволіла б Маскве эфектыўна вырашаць задачы не толькі ў Лацінскай, але і ў Паўночнай Амерыцы. Лацінаамерыканскія СМІ ўжо адзначылі, што адміністрацыя Абамы не робіць нічога, каб супрацьстаяць расейскай, іранскай або кітайскай экспансіі.

Да таго ж дзяржсакратар ЗША Джон Кэры яшчэ ў лістападзе перад членам Арганізацыі амерыканскіх дзяржаў абвясціў аб адмове Вашынгтона ад "дактрыны Манро", якой амерыканскі кантынент абвяшчаўся зонай, закрытай для ўмяшальніцтва еўрапейскіх дзяржаў.

А экс-амбасадар ЗША ў Расеі Майкл Макфал наогул запэўнівае сваіх суайчыннікаў, што ваенная моц цяперашняй Расеі - гэта "цень ад савецкай магутнасці", таму які-небудзь глабальны канфлікт ён лічыць малаверагодным.