Польшча гатовая дабудаваць нафтаправод «Адэса-Броды» да Гданьска

Варшава гатовая вярнуцца да праекта, калі атрымае гарантыі паставак неабходных аб'ёмаў нафты.

Пра гэта на брыфінгу заявіў амбасадар Польшчы ва Украіне Генрык Літвін, перадае УНІАН.

"Для функцыянавання гэтага нафтаправода неабходна дабудаваць участак з польскага і ўкраінскага боку. З польскага боку існуюць юрыдычныя падставы для такога будаўніцтва, і можна было б пераходзіць да інвестыцый. Але для іх цяпер няма эканамічных падстаў: адсутнічаюць гарантыі паставак адпаведных аб'ёмаў каспійскай нафты па адпаведным кошце", - сказаў амбасадар. Ён адзначыў, што ў такіх умовах немагчыма знайсці інвестараў для дабудоўкі нафтаправода.

У той жа час Літвін адзначыў, што ў Польшчы памятаюць пра праект нафтаправода Адэса-Броды-Гданьск, і калі будуць створаныя належныя эканамічныя ўмовы для яго рэалізацыі, краіна гатовая вярнуцца да яго. Таксама амбасадар сказаў, што ў рэалізацыі гэтага праекта Польшча спадзяецца толькі на камерцыйную ініцыятыву і не будзе траціць грошы з дзяржаўнага бюджэту.

Нагадаем, ідэя стварэння на базе ўкраінскага трубаправода Адэса-Броды Еўра-Азіяцкага нафтатранспартнага калідора (ЕАНТК), дабудаваўшы яго да Польшчы, узнікла яшчэ ў пачатку 1990-х гадоў, але да гэтага часу не ўдалося знайсці неабходнага фінансавання на яе рэалізацыю. У якасці аднаго з варыянтаў разглядаўся ўдзел у праекце і Беларусі.

Украіна самастойна дабудавала Адэса-Броды ў 2001 годзе, але з таго часу ён практычна не выкарыстоўваўся, за выключэннем прапампоўвання невялікіх аб'ёмаў у рэверсным рэжыме для паставак расейскай нафты з Брод у Адэсу ў 2005-2010 гадах і паставак нафты ў Беларусь у 2010-2011 годзе.