Мадура знайшоў вінаватых у падрыхтоўцы дзяржаўнага перавароту
7- 26.03.2014, 13:10
- 8,135
Паліцыя Венесуэлы арыштавала трох генералаў ВПС краіны, якія выступілі на баку апазіцыі.
Ім будуць прад'яўленыя абвінавачванні ў падрыхтоўцы дзяржаўнага перавароту. На сустрэчы з кіраўнікамі міністэрстваў замежных спраў лацінаамерыканскіх краін у Каракасе прэзідэнт краіны Нікалас Мадура абвясціў, што арыштаваныя генералы «спрабавалі скарыстацца службовым становішчам, каб арганізаваць паўстанне супраць законнага ўрада». Па словах Мадура, група «мела прамыя кантакты з апазіцыйнымі сектарамі», інфармацыя жа аб гэтым паступіла ад іншых афіцэраў. Прэзідэнт пры гэтым запэўніў, што «расколу ва ўзброеных сілах няма і не будзе».
Антыўрадавыя акцыі пратэсту не спыняюцца ў Венесуэле на працягу двух месяцаў, а сутыкненні паміж прыхільнікамі і праціўнікамі рэжыму Нікаласа Мадура ідуць з пачатку лютага. У ходзе іх загінулі, па меншай меры, 35 чалавек, піша «Коммерсант».
«Адказнасць за кожнага нясуць арганізатары пратэстаў», - абвясціў Мадура.
У аўторак Вярхоўны суд Венесуэлы вынес прысуд мэру горада Сан-Крыстабаль Даніэлю Себальёсу. Той быў прысуджаны да года турэмнага зняволення па абвінавачванні ў папушчальніцтве ўдзельнікам антыўрадавых акцый. У МУС краіны заявілі, што Даніэль Себальёс «садзейнічаў актам неапраўданага гвалту ў Сан-Крыстабалі». Аналагічныя абвінавачванні раней былі прад'яўленыя мэру Сан-Дыега Энца Скарана, асуджанаму да дзесяці месяцаў пазбаўлення волі.
Фота: Reuters