Расейскія турысты: Нас зараз усюды ненавідзяць

З-за падзей у Крыме расейцы пачалі заўважаць негатыўнае стаўленне да сябе за мяжой.

Пра гэта піша ў блогу на snob.ru Аліса Мясішчава.

«Учора прыехала з Прагі мая кватэрная суседка. Яна дзяўчына далёкая ад усякай палітыкі. Замест чытання мільярдаў артыкулаў пра жахі нашай дзяржавы, яна пячэ смачныя тарты і купляе прыгожыя сукенкі. Я бясконца зайздрошчу ёй, гледзячы на тое, як мы ўсе сходзім з глузду ад прадчування апакаліпсісу, а ў яе, без штодзённага запаўнення галавы навінамі, заўсёды ўсё добра. Умее чалавек быць шчаслівым і радавацца дробязям.

Але ўчора яна прыехала вельмі ўсхваляванай. Яе першымі словамі на маё пытанне "ну як з'ездзіла?" быў трывожны шэпт: "Ты ведаеш, Аліса, што нас цяпер ненавідзяць?"

Вядома, ні я, ні яна, ні яе сяброўка-вандроўніца нікога не забівалі, не рабавалі караваны і не далучалі Крым. Аднак, на простым бытавым узроўні супраць нас усіх увялі санкцыі. Дзяўчаты гуляюць па Празе і ідуць мяняць грошы ў касу. Пажылы вясёлы чэх жмурыць вока і пытаецца: "А вы адкуль?" і атрымаўшы адказ, закрывае акно і кажа, што грошай няма.

У барах падыходзяць знаёміцца мілыя юнакі. Здавалася б, іх у дзяўчынах больш павінны цікавіць сукенкі і ўменні печ тарты, але з рускімі размову імкнуцца скончыць хутчэй.

Я магу зразумець гэтых людзей. Вядома, яны таксама бачаць сваю напалову праўду праз свае ўласныя СМІ. Можа быць, яны не так моцна скрыўляюць яе пад свае патрэбы, як наша тэлебачанне, але таксама не крышталёва сумленныя. І пакуль мы абураліся, не падтрымлівалі і супрацьстаялі, нас з вамі таксама запісалі ў ворагі. Як слова "немец" устойліва асацыявалася з фашыстамі ў савецкіх людзей, так і мы зараз сталі захопнікамі.

І быццам пляваць мне на меркаванне чужых, не заўсёды разумных і адукаваных людзей пра мяне. Я ўсё пра сябе ведаю сама, за што можна асабіста мяне любіць і ненавідзець, але ад учорашняй размовы мне стала трохі страшна. Страшна, што з-за таго, за што ўнутры краіны мільёны людзей адчуваюць нацыянальны гонар, за яе межамі прыйдзецца адчуваць нацыянальны сорам.

Супакойце мяне тыя, хто жыве ў заморскіх і не вельмі краінах. Як вы там наогул?» - напісала яна.