Януковіча выключылі з Партыі рэгіёнаў

Адначасова ўнутры Партыі рэгіёнаў адбыўся раскол з нагоды выбару адзінага кандыдата ў прэзідэнты.

Дэлегаты з'езду Партыі рэгіёнаў сёння ў Кіеве прынялі пастанову выключыць з шэрагаў палітычнай сілы экс-прэзідэнта Віктара Януковіча і некалькі прадстаўнікоў яго каманды.

Як паведамляе карэспандэнт ЛІГАБізнесІнформ, акрамя Януковіча партыйнага білета пазбавілі экс-кіраўніка Міндаходаў Аляксандра Кліменку, экс-віцэ-прэм'ера Сяргея Арбузава, былога міністра энергетыкі і вугальнай прамысловасці Эдуарда Ставіцкага, экс-кіраўніка Данецкай АГА Андрэя Шышацкага.

Таксама з Партыі рэгіёнаў выключаны Валерый Канавалюк, які раней выйшаў з палітычнай сілы. У той жа час, у спісе выключаных з партыі няма экс-кіраўніка Адміністрацыі прэзідэнта Андрэя Клюева.

Акрамя таго, прынятая пастанова скасаваць пасаду ганаровага кіраўніка партыі, якую раней займаў Януковіч.

Пастанову аб выключэнні з Партыі рэгіёнаў былога прэм'ер-міністра Мікалая Азарава разгледзяць асобна на просьбу Нестара Шуфрыча.

Адначасова ўнутры Партыі рэгіёнаў адбыўся раскол з нагоды выбару адзінага кандыдата ў прэзідэнты - частка дэлегатаў выступаюць за Міхаіла Добкіна, яшчэ частка - за Сяргея Цігіпку, а астатнія выступаюць за падтрымку кандыдата на выбарах у траўні, паведамляе выданне Навіны Данбаса.

Паводле інфармацыі выдання, на з'ездзе ПР прысутнічаюць усяго 352 дэлегаты з 500 абраных. Цігіпка прыбыў на з'езд ПР адмовіўшыся камунікаваць з журналістамі.

«З'езд ПР наважылі праводзіць цалкам у закрытым рэжыме. Журналісты чакаюць ля ўваходу», - гаворыцца ў паведамленні выдання ў Twitter.

Напярэдадні паведамлялася, што палітычная рада Партыі рэгіёнаў падтрымала кандыдатуру былога старшыні Харкаўскай абласной дзяржаўнай адміністрацыі Міхаіла Добкіна на выбарах прэзідэнта.

Фота: Reuters