Да выходных у Беларусі пацяплее

Красавік у Беларусі пачнецца прахалодным і сухім надвор'ем, але да выходных стане цяплей.

«Красавік пачнецца прахалодным, з паўночнымі вятрамі, але спакойным надвор'ем, які будуць фармаваць скандынаўскія халодныя антыцыклоны. Яны ўстановяць у большасці раёнаў краіны пераважна яснае сухое надвор'е з тэмпературай каля кліматычнай нормы», - паведаміў начальнік службы гідраметэаралагічных прагнозаў Рэспубліканскага гідраметэацэнтра Зміцер Рабаў.

У аўторак кароткачасовыя дажджы магчымыя раніцай і ўначы, днём без ападкаў, тэмпература паветра плюс 2 - 8°С, піша БелаПАН.

У сераду таксама без дажджоў, днём паветра прагрэецца да плюс 3 - 10°С, па Брэсцкай вобласці да плюс 12°С.

У чацвер раніцай і ноччу месцамі магчымы туман, днём ад плюс 7°С да плюс 15°С.

У пятніцу ў асобных раёнах невялікія ападкі (дождж, мокры снег), днём ад плюс 3 да плюс 10°С, па паўднёвым захадзе да плюс 11 - 14°С.

Да выходных у Беларусь прыйдзе больш цёплае надвор'е. У суботу днём прагназуецца да плюс 5 - 10°С, па захадзе да плюс 11 - 15°С. У нядзелю днём чакаецца да плюс 8 - 14°С, па поўдні да плюс 15 - 18°С.