Расейская прапаганда зрабіла з заапарка ў Нікалаеве цэнтр па падрыхтоўцы баевікоў

Крамлёўскія тэлеканалы зноў трапіліся на хлусні.

Пра тое, што ён, дырэктар Нікалаеўскага заапарка, з'яўляецца адным з арганізатараў падзей на Майдане, Уладзімір Топчы даведаўся з Гановера. Патэлефанаваў стары сябар і распавёў, што толькі што глядзеў расейскую інфармацыйна-аналітычную праграму "Воскресное время", адзін з сюжэтаў якой быў прысвечаны "разбору палётаў" падзей на Майдане. І калі гаворка зайшла аб таемных арганізатарах супрацьстаяння, якія існуюць на амерыканскія грошы, паказалі яго, Уладзіміра Топчага, піша сайт niknews.mk.ua.

"Я ў Інтэрнэце знайшоў запіс гэтай праграмы, і сапраўды - у якасці доказу існавання агенцкай сеткі па наўмыснай дэстабілізацыі сітуацыі ў краіне паказалі мяне! На фотаздымку я сяджу ў сваім кабінеце і з кімсьці размаўляю. А голас за кадрам працягвае вяшчаць пра тое, як на амерыканскія грошы існуюць арганізацыі, якія задоўга да вядомых падзей рыхтавалі ці ледзь не баявікоў. Ну, вось як да гэтага ставіцца?" - пытаецца ён.

"Воскресное время" - гэта нядзельны варыянт праграмы "Время", амаль 2 гадзіны актыўнага прамывання мазгоў. Сюжэт, у якім паказалі дырэктара Нікалаеўскага заапарка, пабудаваны на тым, што пасля расфармавання ва Украіне спецпадраздзялення "Беркут" на інфармацыйных прасторах запрацавала новае фармаванне - "Кібер-Беркут". Нібыта гэта група хакераў, якія ўзломваюць пошту і закрытыя інфармацыйныя сістэмы, выцягваючы такім чынам на свет божы доказы сусветнай змовы, якую і арганізаваў Майдан па дакладнай кальцы егіпецкіх падзей.

Спачатку пра гэта ў сюжэце праграмы распавядае нейкі прадпрымальнік, які нібыта ўцёк з Кіева пасля размовы ў СБУ. Чым ён зарабляў у Кіеве не ясна, затое пра асновы падрыўной дзейнасці прадпрымальнік кажа так, што не інакш менавіта ў СБУ яму пра гэта і расказалі. А потым гаворка ідзе пра розныя курсы і семінары па правазнаўстве, на якіх нібыта таксама рыхтавалі людзей для арганізацыі беспарадкаў.

Для доказу "праўдзівасці" выкладзенага мільгаюць нейкія паперы, рахункі, лісты, скрын-шоты сайтаў, фатаграфіі. На адной з фатаграфій - "змоўшчык" Топчы, на другой - пасяджэнне Нікалаеўскага прэс-клуба.

Такія сённяшнія будні расейскай прапаганды. Для таго, каб зрабіць інфармацыю праўдападобнай, гэта значыць падобнай на праўду, патрэбныя "важкія аргументы" і "дакументальныя пацверджанні". Глядач усё роўна не зможа разгледзець, што гэта за паперы, камера буйна пакажа абведзены кружочак, у якім прастаўленыя сумы ў далярах, а голас за кадрам укладзе ў наіўныя вушы спажыўца інфармацыі ўсё, што яму трэба.