Украіна патрабуе ад Расеі зняць забарону на пастаўкі Roshen

Патрабаванне было агучанае праз Сусветную арганізацыю гандлю.

Украіна заклікала Расейскую Федэрацыю неадкладна зняць гандлёвую забарону на пастаўку ў гэтую краіну кандытарскай прадукцыі ўкраінскай карпарацыі Roshen, уведзеную Расспажыўнаглядам у канцы ліпеня 2013 года, паведамляе УНІАН.

У сваёй заяве на пасяджэнні камітэта СГА аб тэхнічных бар'ерах у гандлі 19-20 сакавіка, апублікаванай на сайце арганізацыі, Украіна таксама запатрабавала ад РФ канкрэтызаваць прычыны, праз якія былі ўжытыя дыскрымінацыйныя захады ў дачыненні да Roshen.

Пры гэтым украінская старана падкрэсліла, што дагэтуль не атрымала афіцыйных высноў аб выніках праверкі ўкраінскіх фабрык кандытарскай карпарацыі, якую Расспажыўнагляд праводзіў у лістападзе мінулага года. Да таго ж, Украіна нагадала, што ў складзе расейскай дэлегацыі падчас той праверкі прысутнічалі прадстаўнікі канкурэнта Roshen на расейскім рынку - карпарацыі «Аб'яднаныя кандытары».

Украінская старана таксама заявіла, што прадукцыя Roshen была пратэставаная ў акрэдытаваных лабараторыях, а вынікі даследаванняў адпавядаюць расейскім патрабаванням да харчовых прадуктаў. Зыходзячы з гэтага, Украіна мяркуе, што ўведзеная Расеяй забарона на пастаўку кандытарскіх вырабаў украінскай карпарацыі з'яўляецца дыскрымінацыйнай у дачыненні да яе, а патрабаванні да яе прадукцыі з'яўляюцца больш строгімі, чым да аналагічных тавараў з Расеі ці іншых краін.

Нагадаем, у канцы ліпеня 2013 года Расспажыўнагляд забараніў экспарт у Расею прадукцыі ўкраінскіх кампаній карпарацыі Roshen у сувязі з неадпаведнай якасцю. Расспажыўнагляд інспектаваў украінскія фабрыкі карпарацыі 21-24 кастрычніка, пасля чаго доўга адмаўляўся падаць пратакол працы, а потым заявіў аб неадпаведнасці прадукцыя Roshen санітарным патрабаванням Расеі. Міністэрства аграрнай палітыкі і харчавання назвала такую выснову непрыхаванай хлуснёй. Прадукцыя Roshen дагэтуль не вернутая на расейскі рынак, а Расспажыўнагляд далей намагае, што кампанія не выканала яго патрабаванняў. У выніку гандлёвых абмежаванняў Roshen у пачатку 2014 закрыў Марыупальскую кандытарскую фабрыку.