Новы прэзідэнт Славакіі адмовіўся ад заробку
17- 31.03.2014, 20:26
- 17,290
Абраны прэзідэнтам Славакіі прадпрымальнік і філантроп Андрэй Кіска адмовіўся ад заробку кіраўніка дзяржавы на ўвесь тэрмін сваіх паўнамоцтваў.
Пра гэта паведамляюць мясцовыя СМІ, піша ІТАР-ТАСС.
Паводле іх звестак, Андрэй Кіска ўклаў у перадвыбарчую кампанію з асабістых сродкаў суму, якая перасягае ўсё, што ён зарабіў бы ў якасці прэзідэнта рэспублікі за ўвесь тэрмін свайго знаходжання на вышэйшай дзяржаўнай пасадзе.
Кіраўнік славацкай дзяржавы атрымлівае ў месяц 6600 еўра, а ўзорны гадавы даход Андрэя Кіскі ад яго інвестыцый у розныя фонды складае блізу 700 тысяч еўра.
Абранага прэзідэнта Славакіі ў краіне называюць «пачаткоўцам у палітыцы». Аднак, у якасці філантропа і дабрачынца Андрэй Кіска стаў добра вядомы яшчэ з 2006 года. З тых часоў заснаваны ім некамерцыйны фонд «Добры анёл» дапамог прыкладна 5 тысячам дзяцей, якія маюць анкалагічныя захворванні.
Андрэй Кіска быў абраны прэзідэнтам Славакіі ў другім туры галасавання, атрымаўшы 59,04% галасоў. Свайго апанента, прэм'ер-міністра Роберта Фіцо, ён апярэдзіў амаль на 20% галасоў.