Акупанты выкралі сына экс-прадстаўніка Турчынава ў Крыме
- 31.03.2014, 21:12
- 35,842
На чыгуначным вакзале Сімферопаля затрыманы сын былога прадстаўніка прэзідэнта Украіны ў Крыме Сяргея Куніцына.
Пра гэта паведамілі ў прэс-службе партыі УДАР.
"Ён прыехаў на два дні ў Крым, і сёння вяртаўся ў Кіеў. На чыгуначным вакзале Сімферопаля да яго падышлі прадстаўнікі "самаабароны" і папрасілі паказаць пашпарт. Яго пазналі праз прозвішча", - заявіў Сяргей Куніцын.
Са слоў народнага дэпутата, Аляксея Куніцына адвезлі ў ФСБ.
"Я размаўляў з ім дзве гадзіны таму. Яго абяцалі дапытаць. Ужо паўтары гадзіны ён не адказвае на тэлефанаванні", - паведаміў палітык.
Сяргей Куніцын - былы старшыня Севастопальскай гарадской дзяржаўнай адміністрацыі, экс-прэм'ер-міністр Аўтаномнай Рэспублікі Крым, народны дэпутат Украіны ў 1990-1994 і з 2012 года, дэпутат Вярхоўнай Рады Аўтаномнай Рэспублікі Крым у 1998-2012 гадах. У лютым быў прызначаны прадстаўніком прэзідэнта Украіны на паўвыспе.