Пуцін: Ва Украіне - новая дзяржава, з ёй у нас няма ніякіх дамоваў

Уладзімір Пуцін распавёў, чаму Расея не будзе выконваць Будапешцкі мемарандум.

Прэзідэнт Расеі лічыць, што пасля звяржэння Януковіча на тэрыторыі Украіны ўзнікла новая дзяржава. Пра гэта ён заявіў у адказ на пытанне карэспандэнта агенцтва Reuters аб захаванні Будапешцкага мемарандума, якое прагучала падчас прэс-канферэнцыі ў Нова- Агарове сёння.

"Мы, перш чым сказаць публічна, мы думаем. І стараемся прагназаваць наступствы і рэакцыю ўсіх. Што тычыцца Будапешцкіх пагадненняў, калі мы паказваем на тое, што гэта антыканстытуцыйны пераварот. Кажуць, што гэта рэвалюцыя. Мне цяжка не пагадзіцца з экспертамі, якія лічаць, што на гэтай тэрыторыі ўзнікае новая дзяржава. А з гэтай дзяржавай мы не падпісвалі ніякіх дакументаў", - заявіў прэзідэнт Расеі.

Таксама Уладзімір Пуцін паведаміў аб стане здароўя зрынутага прэзідэнта Украіны, які цяпер знаходзіцца ў Расеі.

"Ён жывы, здаровы. Я з ім бачыўся два дні таму, і ён яшчэ прастудзіцца на пахаванні тых, хто з ім змагаўся", - заявіў Пуцін.

Адзначым, тэма расейскага ўварвання ва Украіну стала галоўнай падчас сённяшняй прэс-канферэнцыі.

Будапешцкі мемарандум - дакумент аб гарантыях бяспекі ў сувязі з далучэннем Беларусі, Украіны і Казахстана да Дамовы аб нераспаўсюджанні ядзернай зброі - міжнародная дамова, заключаная 5 снежня 1994 года паміж Беларуссю, Украінай, Казахстанам, ЗША, Расеяй і Велікабрытаніяй аб бяз'ядзерным статусе Украіны. Пагадненне змяшчае пункты, якія прадстаўляюць Украіне гарантыі яе суверэнітэту і бяспекі.