Мінэканомікі: Беларускія прадпрыемствы разгубілі замовы

Беларускае Мінэканомікі канстатуе мінімальны ўзровень загрузкі прадпрыемстваў краіны замовамі.

Дадзеныя атрыманыя ў выніку апытання, праведзенага ў лютым Навукова-даследчым эканамічным інстытутам (НДЭІ) Міністэрства эканомікі.

«Зніжэнне ўзроўню загрузкі вытворчых магутнасцяў адзначаецца з верасня 2013 года. У лютым дадзены паказчык склаў 64%, што з'яўляецца мінімальным значэннем, зафіксаваным з сакавіка 2010 года», - гаворыцца ў справаздачы.

Больш за ўсіх зніжэнне ўзроўню заказаў закранула прадпрыемствы, якія і без таго выкарыстоўвалі вытворчыя магутнасці ўсяго на 51-60%. Яны перайшлі ў катэгорыю суб'ектаў з загрузкай 30-40% і нават менш за 30%.

Не дзіўна, што «ў сувязі з чаканым попытам» на прадукцыю магутнасці сваіх прадпрыемстваў 75% кіраўнікоў ацанілі як «дастатковыя», 20% далі адказ «больш чым дастатковыя».

У цэлым сітуацыя нерадасная, хоць слабы прагрэс праглядаецца. «48% прадпрыемстваў маюць замовы на тэрмін ад аднаго да трох месяцаў. У параўнанні са студзенем узрасла доля заказаў на тэрмін ад чатырох да шасці месяцаў (на тры пункта), ад сямі да дзевяці месяцаў (на два пункта), а таксама на пяць пунктаў павялічылася доля доўгатэрміновых (больш за 12 месяцаў) замоваў, склаўшы 9%», - гаворыцца ў справаздачы НДЭІ аб выніках праведзенага апытання. Пра гэта піша БелаПАН.

У даследаванні ўдзельнічалі 401 кіраўнік прамысловых арганізацый. Ахоп апытаннем прадпрыемстваў, якія ўваходзяць у дзяржаўны рэестр гаспадарчых суб'ектаў, якія займаюць дамінуючае становішча на таварных рыках, перавысіў 60%.

У студзені 2014 года аб'ём прамысловай вытворчасці скараціўся на 7,1% у параўнанні з аналагічным перыядам 2013 года. Найбольшае зніжэнне аб'ёмаў вытворчасці зафіксавана ў машынабудаванні. За першы месяц бягучага года валавы ўнутраны прадукт знізіўся на 1,1% у параўнанні з аналагічным перыядам мінулага года.