У Менску развіталіся з архітэктарам Леанідам Левіным
4- 4.03.2014, 16:50
- 7,592
У канцэртнай зале «Менск» прайшло развітанне з архітэктарам і старшынёй Саюза беларускіх яўрэйскіх грамадскіх аб'яднанняў і абшчын.
Развітацца з выдатным архітэктарам прыйшлі прадстаўнікі Расейскага яўрэйскага кангрэса, Еўрапейскага яўрэйскага кангрэса, Еўраазіяцкага яўрэйскага кангрэса, Менскага гарвыканкама, апарату ўпаўнаважанага па справах рэлігій і нацыянальнасцяў, прадстаўнікі дыпламатычных колаў, піша «Інтэрфакс».
Спачуванні родным і калегам Леаніда Левіна выказалі амбасадар Германіі ў Беларусі Вольфрам Маас, часовы павераны ў справах ЗША ў Беларусі Ітан Голдрыч, генеральны сакратар Еўрапейскага яўрэйскага кангрэса Серж Цвайгенбаўм.
Леанід Левін пахаваны на цэнтральнай алеі Усходніх (Маскоўскіх) могілак у Менску.
Левін памёр 1 сакавіка ў Менску на 78-м годзе жыцця. Ён - адзін з аўтараў мемарыяльнага комплексу «Хатынь», за які ў складзе аўтарскага калектыву быў ганараваны Ленінскай прэміі.
Левін з'яўляецца аўтарам многіх мемарыяльных комплексаў і помнікаў, усталяваных на месцы гібелі яўрэяў у гады Другой сусветнай вайны. Адна з апошніх работ вядомага архітэктара - квартал яўрэйскага мастака Марка Шагала ў Віцебску.
Саюз беларускіх яўрэйскіх грамадскіх аб'яднанняў і абшчын Левін узначальваў з 1991 года.