У Менску выступіць літоўская спявачка Аліна Арлова
- 5.03.2014, 11:45
- 6,476
Аліна Арлова (Арлоўская) нарадзілася ў чэрвені 1988 года ў Вісагінасе.
Яна дачка літоўскага паляка, яе маці з Варонежа, бацькі былі ў дзяцінстве высланыя ў Казахстан, дзе пазней і пазнаёміліся. Потым вярнуліся ў Літву.
Музычны жанр Аліны Арловай - сумесь самых розных стыляў: фолк, джаз, песенная паэзія, альтэрнатыўны фолк. А брытанскі музычны крытык вызначае стыль творчасці Аліны як «бадзёры змрочны балтыйскі фолкпоп». Аліна Арлова спявае па-літоўску, па-англійску, па-руску.
Гэта ўжо чацвёрты прыезд літоўскай спявачкі ў Менск, з апошняга канцэрта ў Менску прайшло 1,5 года. У рэпертуары з'явіліся новыя песні, якія і будуць прадстаўленыя на маючым адбыцца канцэрце.
Нядаўна выйшла першая ў дыскаграфіі спявачкі канцэртная пласцінка "LRT OPUS LIVE", немалую частку якой склалі новыя і кампазіцыі, якія раней не выдаваліся. Сама Аліна называе "LRT Opus Live" злучным звяном паміж яе апошнім альбомам "Mutabor" (2010) і будучым студыйным альбомам.
Мяркуецца, што канцэрт у гэты раз будзе даўжэй, чым папярэдні.
Канцэрт Аліны Арловай пройдзе ў сталічным клубе Re:Public (вул. Прытыцкага) 7 сакавіка. Пачатак у 19.00.
Арганізатары абяцаюць паставіць у зале мяккія пуфы і крэслы.