Апошні званок у беларускіх школах празвініць 31 траўня

У школах, гімназіях і агульнаадукацыйных ліцэях Беларусі навучальны 2013/2014 год завяршаецца 31 траўня.

Дакумент аб завяршэнні навучальнага года, правядзенні выпускных экзаменаў, прыёму на конкурснай аснове ў асобныя ўстановы адукацыі для атрымання базавай адукацыі, сярэдняй адукацыі накіраваны ва ўсе навучальныя ўстановы краіны, а таксама апублікаваны на афіцыйным партале Міністэрства адукацыі. Пра гэта паведамілі карэспандэнту БелТА ў прэс-цэнтры ведамства.

У дакуменце адзначана, што навучальныя заняткі сканчаюцца 30 траўня 2014 года, а ўрачыстыя мерапрыемствы «Апошні званок» для навучэнцаў IX (Х класаў, у якіх навучаліся дзеці з асаблівасцямі псіха-фізічнага развіцця з пяцігадовым тэрмінам навучання на I ступені агульнай сярэдняй адукацыі), XI (XII) класаў устаноў адукацыі, якія рэалізуюць адукацыйную праграму базавай адукацыі, адукацыйную праграму сярэдняй адукацыі, адукацыйную праграму спецыяльнай адукацыі на ўзроўні агульнай сярэдняй адукацыі, будуць праведзеныя 31 траўня.

Выпускныя экзамены па завяршэнні навучання і выхавання на II і III ступенях агульнай сярэдняй адукацыі пройдуць з 1 па 12 чэрвеня. Выпускныя экзамены па вучэбных прадметах, якія праводзяцца ў пісьмовай форме, будуць пачынацца ў 9 гадзін.

Пасля завяршэння навучання ў 9-м класе вучні павінны будуць здаць чатыры абавязковых выпускных іспыты: беларуская мова ў пісьмовай форме, руская мова ў пісьмовай форме, матэматыка ў пісьмовай форме і гісторыя Беларусі вусна.

Пасля заканчэння 11-х класаў навучэнцы здадуць у гэтым годзе тры абавязковых выпускных іспыты: матэматыку ў пісьмовай форме, беларускую мову або рускую мову (па выбары навучэнца) ў пісьмовай форме і замежную мову (англійскую, нямецкую, французскую, іспанскую) у вуснай форме. Чацвёрты экзамен - па выбары. Гэта выпрабаванне праводзіцца ў вуснай форме, акрамя экзамену па беларускай або рускай мове і мове нацыянальнай меншасці (польскай ці літоўскай).

Для навучэнцаў, якія асвойваюць змест адукацыйнай праграмы сярэдняй адукацыі з вывучэннем асобных вучэбных прадметаў на павышаным узроўні, разам з выпускнымі іспытамі па вучэбных прадметах матэматыка, беларуская мова або руская мова (па выбары навучэнца), замежная мова (англійская, нямецкая, французская, іспанская), абавязковым з'яўляецца выпускны іспыт па адным з вучэбных прадметаў, якія вывучаліся на павышаным узроўні, за выключэннем выпадкаў супадзення вучэбнага прадмета, па якім праводзіцца абавязковы выпускны іспыт.

Для навучэнцаў 11-х класаў устаноў агульнай сярэдняй адукацыі, у якіх навучанне вялося на мове нацыянальнай меншасці (польскай ці літоўскай), абавязковым будзе таксама выпускны іспыт па адпаведнай мове (у пісьмовай форме). Для навучэнцаў 9-х і 11-х класаў праводзяцца выпускныя іспыты ў пісьмовай форме па адпаведнай мове нацыянальнай меншасці па тэкстах, падрыхтаваных Міністэрствам адукацыі.

Выпускны іспыт па выбары можа быць па адным з наступных вучэбных прадметаў: беларуская мова (пераказ), руская мова (пераказ), беларуская літаратура (вусна), руская лiтаратура (вусна), замежная мова (вусна), гісторыя Беларусі (вусна або абарона рэферата), сусветная гісторыя (вусна або абарона рэферата), геаграфiя (вусна), біялогія (вусна), хiмiя (вусна), фiзiка (вусна), астраномія (вусна), iнфарматыка (вусна), грамадазнаўства (вусна), фізічная культура і здароўе (у практычнай форме). Расклад выпускных іспытаў будзе складзены ўстановай адукацыі з улікам адзіных па рэспубліцы тэрмінаў правядзення пісьмовых выпускных іспытаў. Усе заданні для правядзення пісьмовых іспытаў будуць абвешчаныя па тэлебачанні і радыё.