Леанарда Ды Капрыа стаў ганаровым артыстам Чэлябінскага тэатра

Цяпер акцёр зможа бясплатна наведваць усе спектаклі ўральскай установы культуры, а таксама пры жаданні выканаць адну з роляў.

Дырэктар па сувязях з грамадскасцю Чэлябінскага камернага тэатра Юрый Сычоў паведаміў, што Ды Капрыа прысвоілі званне ганаровага артыста ўральскай установы культуры. Так чэлябінцы вырашылі падтрымаць акцёра, якому 3 сакавіка бягучага года ў чарговы раз не далі прэмію Амерыканскай акадэміі кінамастацтваў. Члены журы вырашылі, што галоўны герой стужкі "Воўк з Уол-стрыт" недастаткова добры для "Оскара".

Цяпер Ды Капрыа зможа ў любы дзень бясплатна наведваць усе спектаклі Чэлябінскага тэатра і выкарыстоўваць яго назву ў сваіх рэкламных кампаніях. Адзначым, што Мэцью Маконахі, які заваяваў прыз за "Лепшую мужчынскую ролю" ў 2014 годзе, падобных прывілеяў не мае, перадае ІТАР-ТАСС.

Акрамя таго, у тэатры рады бачыць зорку "Тытаніка" ў якасці выканаўцы адной з роляў у спектаклях. "Асабіста я лічу, што Ды Капрыа літаральна створаны для ролі ў спектаклі "Паланёныя духі". Гэта гісторыя пра ўзаемаадносіны Аляксандра Блока, Андрэя Белага і сям'і Мендзялеева", - адзначыў Сычоў.

Чэлябінскі камерны тэатр ужо паведаміў Леанарда аб прысуджэнні звання ганаровага артыста праз Twitter, яго агентаў і агульных знаёмых у Галівудзе. Таксама калектыў тэатра вырашыў падарыць Ды Капрыа чыгунную статуэтку каслінскага ліцця, вельмі падобную на "Оскар".