Георгій Кандрацьеў: Гэта горшы матч пад маім кіраўніцтвам

Галоўны трэнер зборнай Беларусі пасля паразы ў таварыскім матчы ад каманды Балгарыі канстатаваў, што гульня ў яго падапечных не атрымалася.

Акрамя таго, настаўнік у размове з карэспандэнтам «Прессбола» дадаў:

«Гэта горшы матч зборнай пад маім кіраўніцтвам. Футбалісты апынуліся чамусьці не гатовыя, першыя дваццаць пяць хвілін правялі жудасна. Вымушаны прызнаць: каманда Балгарыі перамагла заслужана.

Адразу пачалі гуляць няправільна. Атрымліваюць крайнія абаронцы мяч - трэба яго наперад дастаўляць Глебу, Радзівонаву. А яны ўвесь час гулялі назад. Супернік стаў прэсінгаваць, накрываць. Балгары фізічна зараз гатовыя лепш. У тым жа "Лудагорцы" гуляюць шэсць зборнікаў - каманда паспяхова выступае ў Лізе Еўропы. Чамусьці пачалі прайграваць практычна ўсю сілавую барацьбу, мяч перастаў трымацца. Што ні кутні - небяспека каля нашай брамы. Гаспадары забілі, маглі перавагу падвоіць. Да чаго даходзіла: два цэнтральных абаронцы прайграюць барацьбу аднаму форварду. Ён іх дваіх "затаптаў" і прабіў у перакладзіну. Прычыну бачу ў тым, што ўнутрана кожны не змог сябе настроіць на сур'ёзную барацьбу з першых хвілін.

Ясна было, што балгары дома паспрабуюць згуляць актыўна, палезуць наперад, будуць навязваць сілавую барацьбу. А мы да яе апынуліся не гатовыя. Калі ж прапусцілі, з'явілася няўпэўненасць, сталі губляць мяч на роўным месцы. Малайцы, што пасля прапушчанага гола ўзялі гульню пад кантроль, стварылі тры-чатыры добрых моманты. Адзін толькі Драгун мог тройчы забіваць галавой. У Пуцілы наогул быў цудоўнейшы шанец. Забей, і тады гульня бы па-іншаму развівалася. Але гэта ўсё ўмоўны лад - трэба забіваць».

Нагадаем, зборная Беларусі ў таварыскім матчы саступіла камандзе Балгарыі з лікам 1:2.