Беларускія чыноўнікі абвясцілі «італьянскую забастоўку»

Чыноўнікі адкрыта сабатуюць патрабаванні Лукашэнкі.

Пра гэта, як паведамляе карэспандэнт сайта charter97.org, заявіў эканаміст Сяргей Чалы, выступаючы на канферэнцыі «Беларусь падчас трансфармацыі. Праблемы, выклікі і чаканні», якая адбылася 5 сакавіка ў Варшаве.

«У беларускіх уладаў няма стратэгічнага бачання таго, што трэба рабіць з эканомікай. Склалася сітуацыя, калі чынавенства разумее, што ў кіраўніка няма плану, акрамя як «дзень прастаяць, ды ноч пратрымацца». Назіраецца вельмі жорсткі крызіс кіравальнасці дзяржапарату. Аж да «італьянскай забастоўкі» чыноўнікаў. Лукашэнка і раней выдаваў шмат цікавых, плённых дэбютных ідэй, але, па меншай меры, чыноўнікі прыводзілі іх у нейкі прыдатны выгляд. Цяпер яго рашэнні выконваюцца даслоўна - у самым абуральным выглядзе», - заявіў ён.

Бліскучым прыкладам такога, па словах Сяргея Чалага, з'яўляецца дэкрэт №9 аб мадэрнізацыі дрэваапрацоўкі, які фактычна ўводзіў прыгоннае права для работнікаў дрэваапрацоўчай галіны на перыяд мадэрнізацыі.

«Дэкрэт выйшаў праз тыдзень пасля таго, як пра яго сказаў Лукашэнка. Ён напісаны настолькі абуральна, што да гэтага часу няма ніводнага выпадку яго правапрымяняльнай практыкі. Ён супярэчыць Канстытуцыі і шэрагу міжнародных дакументаў», - заявіў Сяргей Чалы.

Эканаміст лічыць, што ў такой сітуацыі эканоміку не ўратуе нават чарговы расейскі крэдыт.

Нагадаем, беларускі кіраўнік неаднаразова выказваў вялікае незадавальненне працай урада. У канцы мінулага года яго пагрозу «адкруціць галовы» членам урада паказалі ў сваіх рэпартажах усе асноўныя тэлеканалы краіны. Лукашэнка на ўсю краіну паабяцаў пакараць чыноўнікаў за невыкананне праграмы будаўніцтва лагістычных цэнтраў. Да гэтага дадалася і крытыка чыноўніка за зрыў праграм мадэрнізацыі шэрагу галін эканомікі.