Сяргей Чалы: Лукашэнка ўжо праеў апошні расейскі крэдыт

Заявы беларускіх уладаў аб стабільнасці эканомікі - поўнае глупства.

Такое меркаванне выказаў эканаміст Сяргей Чалы на канферэнцыі «Беларусь падчас трансфармацыі. Праблемы, выклікі і чаканні», якая прайшла 5 сакавіка ў Варшаве, паведамляе карэспандэнт сайта charter97.org.

«Паводле аб'ектыўных паказчыкаў, памеры дысбалансу, якія ёсць у беларускай эканоміцы, вельмі падобныя на тое, што зараз перажывае ўкраінская эканоміка. На 2014 год дэфіцыт цяперашняга рахунку плацежнага балансу ацэньваецца ў 11 з невялікім адсоткаў ВУП, а 2013 скончыўся 9 адсоткамі. Гэта прыкладныя ўкраінскія паказчыкі. Сітуацыя з золатавалютнымі рэзервамі ў Беларусі яшчэ горшая, чым ва Украіне. Я да таго, што пры гэтым эканамічную сітуацыю ва Украіне ў нас у Беларусі называюць катастрофай, а беларускую эканамічную сітуацыю называюць стабільнасцю і стварэннем умоў для ўстойлівага росту, што, натуральна, з'яўляецца поўным глупствам», - падкрэсліў эксперт.

Эканаміст дадаў, што сітуацыя ратуецца ад дэвальвацыі нібыта тытанічныя намаганнямі Лукашэнкі, чым ён паспяшаўся пахваліцца на нядаўняй прэс-канферэнцыі для кіраўнікоў СМІ.

«Ён сказаў, маўляў, цяпер маёй асабістай справай, справай гонару з'яўляецца пасароміць тых эканамістаў, якія сцвярджаюць, што крызіс і дэвальвацыя непазбежныя, і вы павінны бачыць, як я гэта зраблю. Распавяду, як ён гэта зрабіў. 27 снежня 2013 быў атрыманы нават не міждзяржаўны, а брыдж-крэдыт расейскага банка на 440 мільёнаў даляраў. І ён ужо ўвесь праедзены. Каб было зразумела, што такое 11% дэфіцыту рахунку плацежнага балансу, растлумачу: гэта азначае, што нават пры спрыяльным збегу абставінаў, калі атрымаецца ажыццявіць праграму прыватызацыі на 2-2,5 мільярды даляраў, дэфіцыт знешняга фінансавання ў 2014 годзе ацэньваецца ў 4-4,5 мільярда даляраў. І гэта значыць, што нават шырока анансаванага расейскага крэдыту на 2 мільярды даляраў, які пакуль вельмі віртуальны і пастанова аб якім можа быць прынятая толькі ў сярэдзіне года, хопіць максімум на паўгода для таго, каб нічога катастрафічнага не здарылася», - адзначыў Сяргей Чалы.