Чуркін абверг сам сябе

Пастаянны прадстаўнік Расеі пры ААН Віталь Чуркін заявіў, што Масква не разрывала стасункаў з Кіевам.

«Аб дыпламатычных адносінах я наогул не разважаў ні публічна, ні на пасяджэннях Рады Бяспекі, бо такога роду інфармацыя не мае пад сабой ніякіх падстаў», - заявіў Віталь Чуркін у інтэрв'ю тэлепраграме «Весткі ў суботу», якая трансліравалася ў эфіры на Далёкі Ўсход.

На яго думку, падставай да такіх чутках мог стаць адказ на пытанне пасля закрытага пасяджэння Рады Бяспекі, якое адбылося ў чацвер, паведамляе «Інтэрфакс».

«Адзін з журналістаў запытаўся мяне, чаму міністр замежных спраў Лаўроў у Парыжы не сустрэўся з міністрам замежных спраў Украіны, і я адказаў, што мы зыходзім з таго, што цяперашнія ўлады Украіны з'яўляюцца нелегітымнымі, таму ўстрымліваемся ад кантактаў з імі на палітычныя тэмы на палітычным узроўні», - растлумачыў сталы прадстаўнік Расеі.

Ён дадаў, што з украінскімі калегамі не маюць стасункаў, бо яны не звяртаюцца да расейскіх дыпламатаў.

«Яны самі, скажам, запытваюць пасяджэнне Рады Бяспекі, не тлумачачы нам, навошта яны гэта робяць, - удакладніў Чуркін. - Але ў нас няма забароны на такія стасункі. Палітычны ўзровень - гэта ўзровень міністра замежных спраў, у нас ніякай забароны або абмежавання ў дачыненні да магчымасці адносін з украінскімі дыпламатамі няма. Тое ж самае справядліва і ў дачыненні да міністэрства замежных спраў: на працоўным узроўні там зусім спакойна працягваюць мець адносіны з украінскімі калегамі».