Аўтамабілісты адмаўляюцца плаціць пошліну

«Белтэхагляд» скардзіцца на тое, што беларускія кіроўцы сталі радзей праходзіць тэхагляд.

Учора ў першым чытанні ў «парламенце» быў прыняты законапраект, у якім, акрамя ўсяго іншага, прадугледжаныя павелічэнне штрафаў за няпройдзены тэхагляд (на першы раз штраф складзе ад 150 да 450 тысяч рублёў) і паўторнасць (у другі раз на працягу года - ад 300 да 750 тысяч рублёў). Сёння ў «Белтэхаглядзе» карэспандэнту onliner.by пракаментавалі: гэта выраўнуе сітуацыю і зробіць выгадным праходжанне ТА.

- З пачатку гэтага года на станцыі дыягностыкі прыехала на 13,8% аўтамабіляў менш, чым за той жа перыяд 2013-га, - распавялі ў «Белтэхаглядзе». - У студзені зніжэнне склала 30,9%, у лютым - 17%, а вось у сакавіку назіраўся некаторы рост - на 1,9%. Гэта звязана выключна з павелічэннем базавай велічыні.

Пасля ўвядзення дзяржпошліны, выплата якой прывязаная да праходжання ТА, кіроўцаў, якія жадаюць прайсці тэхагляд, стала значна менш. Многія падлічылі, што больш выгадна плаціць штрафы. На дадзены момант прадугледжанае папярэджанне або штраф да 2 б. в. (цяпер - 300 тыс. рублёў), аднак пры згодзе з парушэннем звычайна прызначаюць 0,5 б. в. (75 тыс. рублёў).

- У законапраекце, якому яшчэ трэба будзе прайсці слуханні ў верхняй палаце парламента і атрымаць адабрэнне прэзідэнта, прапануецца, па-першае, павялічыць памер штрафаў да 1-3 б. в., па-другое, увесці паўторнасць (за такое ж парушэнне на працягу года штраф складзе 2-5 б. в.), па-трэцяе, прыбраць папярэджанне, - удакладнілі ў «Белтэхаглядзе».

Атрымаецца, што дзяржпошліна на адзін год для найбольш папулярнай катэгорыі аўтамабіляў (масай ад 1,5 да 2 тон) і максімальны штраф за паўторнасць будуць складаць 5 б. в. На станцыях дыягностыкі лічаць, што гэта стане дзейснай мерай. Там таксама звярнулі ўвагу: у ліку парушальнікаў у асноўным звычайныя аўтаўладальнікі, асабліва на перыферыі.