П'яны кіроўца зладзіў гонкі з ДАІ па Гомелі

Пагоня скончылася ў возеры.

У ноч на 15 красавіка экіпаж Дзяржаўтаінспекцыі паспрабаваў спыніць аўтамабіль ВАЗ-21099 на скрыжаванні Рэчыцкага праспекта і вуліцы Косарава. Кіроўца адрэагаваў тым, што рэзка развярнуўся і кінуўся блукаць па вуліцах. Каб злавіць яго, давялося страляць у паветра і вывуджваць парушальніка з вады. Абласная ДАІ падала відэа з рэгістратара міліцэйскага аўтамабіля, піша onliner.by.

Падчас пагоні кіроўца ВАЗа на гукавую і светлавую сігналізацыю не рэагаваў. Пры абвяшчэнні пра тое, што будзе выкарыстаная зброя, накіраваўся ў бок вуліцы Давыдоўскай і далей за горад. Не даязджаючы Асаўцоў, збочыў да возера.

Адзін з афіцэраў двойчы стрэліў у паветра. Пасля гэтага кіроўца кінуў аўтамабіль з пасажыркай і пабег да возера. Кінуўшыся ў ваду, праплыў амаль дзесяць метраў, але хутка змёрз. Зразумеўшы абсурднасць сваёй задумы, вярнуўся на бераг да інспектараў ДПС.

Паводле інфармацыі ДАІ, выняты з вады 25-гадовы грамадзянін 6 разоў прыцягваўся да адміністрацыйнай адказнасці за парушэнні ПДР. У тым ліку ў кастрычніку мінулага года быў затрыманы за кіраванне аўтамабілем у стане алкагольнага ап'янення і пазбаўлены правоў на 3 гады. Гэтым разам ён зноў быў п'яны.

У дачыненні да кіроўцы ВАЗа складзена 15 адміністрацыйных пратаколаў, у тым ліку за непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў. Таксама будзе распачатая крымінальная справа за кіраванне аўтамабілем у стане ап'янення. Аўтамабіль арыштаваны.