СК Беларусі перадаў «калійную справу» расейскаму боку

Следчы камітэт Беларусі прыняў рашэнне аб перадачы крымінальнай справы ў дачыненні да былых службовых асоб БКК расейскаму боку.

Пра гэта сёння журналістам паведаміў начальнік галоўнага ўпраўлення па расследаванні злачынстваў у сферы арганізаванай злачыннасці і карупцыі Следчага камітэта Беларусі Сяргей Вараб'ёў, перадае карэспандэнт БелТА.

"У цяперашні час Следчым камітэтам Беларусі прынятае рашэнне аб перадачы крымінальнай справы па абвінавачванні былых службовых асоб Беларускай калійнай кампаніі, у тым ліку Уладзіслава Баўмгертнера, Керымава і іншых (усяго шэсць чалавек), праваахоўным органам Расеі. Усе абвінавачаныя з'яўляюцца грамадзянамі гэтай краіны і знаходзяцца на яе тэрыторыі", - заявіў Сяргей Вараб'ёў.

Ён таксама паведаміў, што сёння гэта крымінальная справа была перададзеная ў Генеральную пракуратуру Беларусі для ажыццяўлення яе перадачы расейскаму боку. Акрамя таго, па запыце Следчага камітэта рэспублікі Генпракуратура праводзіць працу па падрыхтоўцы і прад'яўленні пазоўных патрабаванняў да асоб, вінаватых у прычыненні шкоды беларускім прадпрыемствам.

Як паведамлялася, раней генеральны пракурор Беларусі Аляксандр Канюк паведамляў журналістам, што Генпракуратура заявіць грамадзянскія пазовы да фігурантаў калійнай справы як да фізічных асоб. Генпракурор таксама адзначыў, што ўзбуджана каля 15 крымінальных спраў. "Важна, што мы будзем заяўляць грамадзянскія пазовы аб спагнанні ўрону па гэтых справах, але не да арганізацый, а да фізічных асоб, якія вінаватыя ў яго прычыненні. Нават без узбуджэння крымінальнай справы - у рамках грамадзянскага судаводства. У тым ліку будзем апераваць такімі паняццямі, як "выпушчаная выгада", - сказаў ён.

Крымінальныя справы ў дачыненні да службовых асоб ЗАТ "Беларуская калійная кампанія" былі распачатыя ў 2013 годзе Генеральнай пракуратурай па ч.3 арт.424 "Злоўжыванне ўладай і службовымі паўнамоцтвамі" КК. У тым ліку адным з фігурантаў гучнай справы стаў старшыня назіральнага савета ЗАТ - Уладзіслаў Баўмгертнер. Ён быў затрыманы ў Беларусі і заключаны пад варту. Пасля яго перавялі пад хатні арышт, а затым перадалі расейскаму боку.