Хрысціяне святкуюць Вялікдзень

Праваслаўныя, каталікі і пратэстанты 20 красавіка адзначаюць свята Уваскрэсення Хрыстовага.

У гэты дзень хрысціяне ўспамінаюць перамогу Хрыста над грахом і смерцю - перамогу, якая вызваліла чалавецтва ад няволі д'ябла і адкрыла для кожнага з людзей шлях збавення. У свяце Вялікадня сабраная ўся існасць хрысціянскага вучэння аб збавенні: Бог стаў чалавекам, каб чалавек стаў Богам. "Як у Адаме ўсе паміраюць, так у Хрысце ўсе аджывуць", - казаў апостал Павел.

Упершыню пра Уваскрасенне Хрыстова гэтай ноччу было абвешчана падчас начных хросных хадоў.

Вялікдзень - пераходнае свята, і яго дата для кожнага года асобна вылічаецца паводле месяцова-сонечнага календара. Першыя хрысціяне святкавалі Вялікдзень штотыдзень - пятніца была днём паста ў гонар пакут Хрыстовых, а нядзеля - днём радасці аб уваскрослым Госпадзе. З II стагоддзя свята стала штогадовым.

У гэтым годзе Вялікдзень святкуе адначасова ўвесь хрысціянскі свет. Такое супадзенне пасхаліі сістэмы разліку даты Вялікадня) у розных хрысціянскіх канфесій адбываецца раз у некалькі гадоў. Наступны раз ўсходнія і заходнія хрысціяне адзначаць Вялікдзень разам ў 2017 годзе.

Адрозненне ў пасхаліях грунтуецца на розніцы ў вылічэнні дня вясновага раўнадзенства ў юліянскім і грыгарыянскім календарах, паводле якіх жыве вялікая частка ўсходніх і заходнія хрысціян, а таксама на адмове каталікоў ад правіла несупадзення хрысціянскага Вялікадня з габрэйскім.