Мінабароны РФ: Палёты ля берагоў Японіі патрэбныя для ціску на Токіо

Масква хоча заахвоціць Токіо «скарэктаваць» некаторыя рашэнні.

Палёты расейскіх ваенных самалётаў, якія ў апошні час пачасціліся і ўсё часцей турбуюць Японію, як высветлілася, выкліканыя не толькі пускамі паўночнакарэйскіх ракет. Гэта вынікае з заявы намесніка міністра абароны РФ Анатоля Антонава. Мяркуючы па яго словах, якія прыводзіць ІТАР-ТАСС, такім чынам Масква хоча заахвоціць Токіо «скарэктаваць» некаторыя рашэнні, прынятыя Японіяй на хвалі ўсеагульнай антырасейскай крытыкі.

Гаворка ідзе пра запушчаны ў 2013 годзе працэс распрацоўкі расейска-японскага пагаднення аб прадухіленні небяспечнай ваеннай дзейнасці. Ваенныя ведамствы па ўсім свеце практыкуюць заключэнне падобных дамоваў, каб пазбегнуць узнікнення заклапочанасцяў, звязаных з палётамі замежнай ваеннай авіяцыі, нагадаў Антонаў.

Адпаведныя пагадненні «прадугледжваюць стварэнне каналаў сувязі і механізмаў узаемадзеяння, якія дазваляюць аператыўна здымаць заклапочанасці ў дачыненні да ваеннай дзейнасці адзін аднаго побач з нацыянальнымі межамі», адзначыў намеснік кіраўніка Мінабароны РФ. Ён таксама адзначыў, што ініцыятарамі пачатку перамоваў аб заключэнні пагаднення выступілі самі японцы.

Расейскія вайскоўцы пайшлі ім насустрач, мяркуючы, што такая дамоўленасць будзе адпавядаць інтарэсам абедзвюх краін. «Гэта рашэнне было аформлена ў якасці даручэння ваенным ведамствам па выніках стратэгічнага дыялогу ў фармаце «два плюс два» ў Токіо. (...) Разам з тым у сярэдзіне сакавіка з заявы МЗС Японіі (расейскія вайскоўцы) са здзіўленнем даведаліся, што Токіо ў аднабаковым парадку прыпыняе сумесную працу над пагадненнем», - распавёў Антонаў.

Ён выказаў шкадаванне падобнымі дзеяннямі японскага боку, паказаўшы, што, «у падыходах нашых партнёраў узяла верх нейкая «заходняя» салідарнасць, у ахвяру якой былі прынесеныя нацыянальныя інтарэсы бяспекі».

Разам з тым Антонаў адзначыў, што, мяркуючы па паведамленнях СМІ, міністр абароны Японіі Іцуноры Анадэру выказаў заклапочанасць «частымі» палётамі расейскай ваеннай авіяцыі ў Японскім моры і над акваторыяй Ціхага акіяна.

«Як вынік паведамляецца, што 14 красавіка чатыры японскіх знішчальніка выляталі на перахоп расейскіх самалётаў», - сказаў Антонаў, падкрэсліўшы, што самалёты расейскіх ВПС дзейнічалі ў строгай адпаведнасці з патрабаваннямі міжнароднага права і «нічыіх паветраных межаў не парушалі, іх палёты ні для каго пагрозы не ўяўлялі».

Ён таксама выказаў надзею, што «эпізод ад 14 красавіка паслужыць падставай для карэкціроўкі японскімі калегамі сваіх падыходаў да ўзаемадзеяння з Мінабароны РФ і аднаўлення перапыненай працы». «Мы да гэтага гатовыя», - запэўніў намеснік міністра.

Паведамленні аб вылетах японскіх знішчальнікаў у сувязі з дзейнасцю расейскай авіяцыі з'яўляліся ў апошні час ці ледзь не кожны дзень. Адзін з апошніх інцыдэнтаў адбыўся ў канцы мінулага тыдня - знішчальнікі ВПС Японіі былі паднятыя па трывозе ў сувязі з набліжэннем да паветранай прасторы краіны пяці расейскіх ваенных самалётаў.