The Times: Перамагчы Пуціна пад сілу самім рускім

Той факт, што простыя людзі цяпер захоўваюць пад матрацам даляры і еўра, а не рублі, не абяцае Расеі добрай будучыні.

Пра гэта піша брытанскі гісторык і публіцыст Майкл Бёрлі ў The Times (пераклад - Inopressa.ru).

На дадзены момант рэйтынг Уладзіміра Пуціна складае 80%, але апошнія падзеі радуюць яго не толькі гэтым. НАТА апынулася прадказальна не гатовае адказаць на дзеянні Расеі: можна падумаць, пара знішчальнікаў F-16 і адзін баявы карабель нешта значаць у вельмі складанай палітычнай вайне, у якой Расея задзейнічае ўсе галіны дзяржаўнай улады для дасягнення сваіх мэтаў, абураецца аўтар.

"Залежнасць Еўропы ад паставак энерганосьбітаў перашкодзіла больш рашучай рэакцыі на дзеянні Расеі. Шэраг краін ЕЗ - Кіпр, Італія, Іспанія і, што больш важна, Германія - відавочна не жадаюць накладваць на Расею жорсткія санкцыі", - працягвае гісторык.

"Так што гейм, калі не ўвесь матч, застаўся за Пуціным, хоць ад Прыбалтыкі і Малдовы да Казахстана (ва ўсіх гэтых краінах пражываюць рускамоўныя меншасці) кіраўнікі насцярожыліся", - робіць выснову публіцыст.

Аднак у дадатак да 1,5 і 7 млрд даляраў штогадовых субсідый Абхазіі і Паўднёвай Асеціі і Беларусі Уладзіміру Пуцін прыйдзецца траціць яшчэ 2 млрд даляраў на забеспячэнне Крыма харчаваннем і энергіяй. Да таго ж рубель у гэтым годзе ўжо ўпаў на 10%, а 70 млрд даляраў былі выведзеныя з краіны.

"Нічога сур'ёзнага не было зроблена для барацьбы з карумпаваным бізнес-кліматам або для дыверсіфікацыі эканомікі, якая фатальна залежыць ад кошту ў 110 даляраў за барэль нафты для аплаты адданай пуцінскай арміі пенсіянераў і паліцыянтаў. Той факт, што простыя людзі цяпер захоўваюць пад матрацам даляры і еўра, а не рублі, не абяцае Расеі добрай будучыні, як і колькасць насельніцтва, якой прадказанае скарачэнне з сённяшніх 143 млн да 107 млн да 2050 года", - адзначае аўтар.

У 1904 годзе царскі міністр унутраных спраў Вячаслаў Пляве сказаў: "Каб утрымаць рэвалюцыю, нам патрэбная маленькая пераможная вайна". "Магчыма, Пуцін дзейнічаў у тым жа духу, аднак з улікам яго нованабытай цікавасці да расейскай гісторыі ён павінен ведаць, што тая вайна ў канчатковым выніку прывяла да той самай рэвалюцыі", - заключае аўтар.