ГПУ правярае 33 паплечнікаў Януковіча, якія маюць дачыненне да бізнеса «сям'і»

Спецыяльная следчая група Генпракуратуры вядзе праверку 50 прадпрыемстваў, банкаў і 33 чалавек з бліжэйшага атачэння Януковіча.

Пра гэта заявіў першы намеснік генеральнага пракурора Украіны Мікалай Галомша, выступаючы на канферэнцыі "Вяртанне ўкраінскіх актываў карумпаваных палітыкаў", піша "Украинская правда".

Ён сказаў, што генеральная пракуратура цяпер даволі актыўна вядзе расследаванне маштабных эканамічных і палітычных злачынстваў.

"Уся дзяржаўная машына працавала выключна на тое, каб дапамагаць асобным чыноўнікам і кіраўнікам маніпуляваць дзяржпраграмамі і адмываць бюджэтныя грошы. Чыноўнікі, маючы доступ да дзяржаўнай маёмасці, кралі іх, а ўся сістэма праваахоўных органаў не заўважала гэтыя маніпуляцыі і злачынствы", - адзначыў Галомша.

Ён прызнае, што да канца іх ніхто не ўяўляў сабе маштабы карупцыі, якія былі апошнія 4 гады.

"Разам з Нацбанкам мы зараз выявілі 14 адмывачных банкаў, якія адмылі 140 млрд. грыўняў. Мы заўважылі, што ўсе гэтыя злачынствы мелі пачатак ад вышэйшага кіраўніцтва краіны. Стваралася сетка, мэта якой - узбагачэнне сям'і былога прэзідэнта Януковіча", - растлумачыў першы намеснік генеральнага пракурора.

Генеральная пракуратура ўжо ўзбудзіла 264 крымінальныя справы на ўкраінскіх чыноўнікаў і людзей, якія падазраюцца ў карупцыі і адмыванні грошай. У цэлым па Украіне, такіх спраў ужо больш за 1000.

Арыштаваная маёмасць і рахункі ва Украіне Януковіча і яго старэйшага сына, Клюева і Прысяжнюка на 1 млрд грыўняў і больш за 1 млрд грыўняў у каштоўных паперах. Таксама на іх цкраінскіх рахунках замарожана 9 млн даляраў.

"Правяраюцца таксама іх партнёры, пад кантролем больш за 50 прадпрыемстваў, некалькі банкаў і 33 фізічныя асобы, якія маглі быць задзейнічаныя ў адмыванні грошай "сям'і", - сказаў Галомша.

Першы намеснік генеральнага пракурора Украіны распавёў пра цяжкасці, з якімі сутыкаюцца следчыя.

"Мы сутыкнуліся з праблемай, калі на ўсіх ключавых пасадах усюды былі людзі з 3-х рэгіёнаў краіны, блізкія да сям'і Януковіча і яго атачэння", - заявіў Галомша.

Паводле яго слоў, гэтыя людзі дзейнічалі нават на сярэднім кіраўнічым узроўні ва ўсіх рэгіёнах Украіны, і яны далі магчымасць усім падазраваным у карупцыі і злачынствах пакінуць межы краіны.

Больш за тое, як паведаміў Галомша, яны перавялі спецтэхніку спецслужбаў з Кіева ў Крым і нават асобныя віды зброі, дазволілі вывезці шматлікія дакументы і доказы па многіх крымінальных справах у Крым.

"Мы не разумелі, чаму гэтыя справы пераведзеныя ў Крым, напрыклад, па справе аб так званых "вышках Бойкі", - распавёў Галомша.

Цяпер пракуратура Украіны вядзе перамовы з Расеяй аб вяртанні гэтых дакументаў і тэхнікі.