Ні адзін беларускі банк не прадае даляр танней за 10 тысяч рублёў

У Беларусі працягвае даражэць даляр.

Пра гэта сведчыць пастаянны маніторынг каціровак, якія выстаўляюцца галаўнымі аддзяленнямі банкаў, які праводзіцца БелаПАН.

22 красавіка па курсе 9.990 рублёў за грашовую адзінку ЗША прапаноўвалі два банкі - "РРБ-Банк" і "Тэхнабанк". На наступны дзень столькі каштаваў даляр толькі ў банку "Масква-Мінск". 24 красавіка амерыканскую валюту прадавалі па курсе ад 10.000 ("Парытэтбанк", " Тэхнабанк ", "Масква-Мінск", Беларускі банк малога бізнесу, банк "Гандлёвы капітал" і "Цэптэр-банк") да 10.180 ("Дэльта-банк").

У той жа час гістарычны рэкорд складае 10.300 рублёў. Такі курс продажу даляра быў зафіксаваны ў "ХоўмКрэдытБанку" ў кастрычніку 2011 года, у разгар фінансавага крызісу.

З 1 па 24 красавіка сярэдні курс наяўнага даляра вырас на 1,23% (з 9.870,5 да 9.992 рублёў), з пачатку года - на 4,43%.

У студзені гэтага года амерыканская валюта падаражэла на 0,64%, у лютым - на 1,51% , у сакавіку - на 0,97%.