Барак Абама згуляў у футбол з японскім андроідам (Відэа)

Робат зрабіў моцнае ўражанне на прэзідэнта ЗША.

У ходзе афіцыйнага візіту ў Японію Барак Абама паспеў не толькі абмеркаваць пытанне ўвядзення новых санкцый супраць Расеі і пакаштаваць сушы ад знакамітага шэф-кухара, але і бліжэй пазнаёміцца з новым пакаленнем знакамітага робата Asimo кампаніі Honda, перадае The Verge.

Абама змог павітацца з Asimo, які не толькі прабегся перад прэзідэнтам, але і паказаў, як умее скакаць на адной назе. У завяршэнне знаёмства Asimo прадэманстраваў, што нядрэнна ўмее гуляць у футбол, чым вельмі ўразіў Абаму.

Акрамя таго, прэзідэнту прадставілі і іншага робата, створанага для ліквідацыі наступстваў надзвычайных сітуацый. Рэпартаж, прысвечаны знаёмству Абамы з дасягненнямі японскай робататэхнікі, апублікаваны на YouTube.

Пасля гэтага Абама даў каментар журналістам, у якім адзначыў, што робаты пачынаюць трохі палохаць яго, паколькі ўсё больш паходзяць на чалавека. Пазней, падчас зносінаў з японскімі студэнтамі, прэзідэнт ЗША адзначыў важнасць навуковых даследаванняў і сказаў, што, валодаючы значна большым аб'ёмам тэхналогій, чым усе папярэднія пакаленні, яны маюць фактычна бязмежныя магчымасці для дасягнення новых вышынь, піша NEWSru.com.

Кампанія Honda вядзе распрацоўку робата-андроіда Asimo з 1986 года і з тых часоў выпусціла некалькі пакаленняў Asimo. Рост робата складае 130 сантыметраў, ён можа перамяшчацца з хуткасцю да 9 км/г, хадзіць па лесвіцы, пазнаваць людзей, распазнаваць жэсты, прадметы, паверхні і гукі.