Захопнікі Славянска пацвердзілі затрыманне місіі АБСЕ

Вячаслаў Панамароў не змог пацвердзіць, ці ёсць сярод затрыманых пасажыраў назіральнікі АБСЕ.

"Народны мэр" Славянска (Данецкая вобласць Украіны) Вячаслаў Панамароў пацвярджае інфармацыю аб затрыманні аўтобуса з украінскімі вайскоўцамі і цывільнымі асобамі, у аўтобусе, паводле ягоных звестак - забароненыя боепрыпасы, піша "Інтэрфакс".

"Мы сапраўды затрымалі аўтобус, там адразу ж былі знойдзеныя забароненыя разрыўныя кулі ды іншыя боепрыпасы, цяпер разбіраемся, хто былі гэтыя людзі, якія ў ім ехалі. Пакуль мы не можам пацвердзіць, што сярод іх сапраўды назіральнікі АБСЕ, бо мы не ўсталявалі пэўна іх прыналежнасць - будзем правяраць", - сказаў ён праз тэлефон.

Панамароў паведаміў, што затрыманыя знаходзяцца ў Славянску ў будынку ўправы СБУ, якую кантралююць антымайданаўцы.

Раней прэс-служба МУС Украіны паведаміла аб захопе групай невядомых аўтобуса, у якім знаходзіліся прадстаўнікі АБСЕ.

"25 красавіка 2014 года аб 11:40 на ўездзе ў горадзе Славянск з боку Краматорска невядомыя спынілі аўтобус з 13 пасажырамі. Сярод іх знаходзіліся 7 прадстаўнікоў АБСЕ, 5 прадстаўнікоў Узброеных Сіл Украіны і кіроўца транспартнага сродку", - адзначаецца ў паведамленні міністэрства, апублікаваным у пятніцу вечарам.

"Тэрарысты адвялі аўтобус з пасажырамі на тэрыторыю УСБУ ў Славянску. Цяпер захопленыя грамадзяне знаходзяцца там", - сцвярджаюць у МУС Украіны.

У міністэрстве паведамілі, што цяпер працягваюцца перамовы з асобамі, якія захапілі аўтобус.

Дагэтуль ў МЗС Украіны заявілі аб знікненні сувязі з членамі вайсковай верыфікацыйнай місіі АБСЕ ў Данецкай вобласці.