Канада адмовілася запускаць спадарожнік з Байканура
11- 25.04.2014, 19:58
- 11,460
Канада адмовілася ад запуску мікраспадарожніка M3MSat з дапамогай расейскай ракеты праз падзеі ва Украіне.
Пра гэта ў Twitter заявіў экспэрт у касмічнай галіне Пітэр дэ Селдзінг, піша РБК.
Планавалася, што Канада адправіць спадарожнік на касмадром Байканур, а адкуль яго запусцяць у космас у чэрвені 2014 з ракетай-носьбітам "Саюз-2.1б".
Разам з М3МSat планавалася запусціць касмічны апарат "Метэор-М" №2, мікраспадарожнікаў МКА-ПН2 ("Рэлек"), Ukube-1, SkySat-2, TechDemoSat-1, AISSat-2, DX-1, "Баўманец-2" і Venta-1.
Спадарожнік M3MSat прызначаны для маніторынгу марскіх суднаў і перадачы паведамленняў.
Адмову Канады ад запуску спадарожніка ўжо пракаментаваў віцэ-прэм'ер Дзмітрый Рагозін. "Грошы канадцы страцілі дакладна", - напісаў куратар АПК у сваім Twitter. Атрымаць каментар Раскосмасу пакуль не ўдалося.
Стасункі паміж Расеяй і Канадай абвастрыліся пасля пачатку крызісу на Украіне. У сакавіку Атава ўвяла візавыя і фінансавыя санкцыі супраць расейскіх чыноўнікаў і банка "Расея". Пры гэтым імёны чыноўнікаў, якія трапілі пад санкцыі, улады Канады называць не сталі. Першы сакратар амбасады Канады ў Расеі Маргарыта Атанасаў была выправаджаная з Расеі, да гэтага з Канады быў высланы расейскі вайсковы дыпламат Юрый Безлер, які займаў пасаду старэйшага памочніка вайсковага аташэ.
Пасол Расеі ў Канадзе Георгій Мамедаў заявіў, што ў выпадку, калі Атава ўвядзе эканамічныя санкцыі, то Масква зробіць захады ў адказ у дачыненні да канадскага бізнэсу.