Тры групы войскаў Расеі ля межаў Украіны прыведзены ў баявую гатоўнасць
58- 27.04.2014, 15:29
- 55,956
Перамяшчэнне войскаў можа сведчыць аб падрыхтоўцы да ўварвання.
Ідэнтыфікуюцца тры магутныя групы расейскіх войскаў, якія прыведзены ў поўную баявую гатоўнасць ля ўсходніх межаў Украіны і ў Крыме: «Поўнач», «Цэнтр» і «Поўдзень».
Пра гэта паведаміў былы першы намеснік начальніка Генштаба ВСУ, адмірал Ігар Кабаненка ў сацыяльнай сетцы «Фэйсбук».
Паводле яго інфармацыі, рух войскаў сведчыць аб іх падрыхтоўцы да чагосьці.
«Гэта «нешта» бліжэйшым часам можа быць:
1. Працяг «арэляў» ля нашых межаў з правакацыйнай і мэтай застрашвання адначасова - пашырэнне зон нестабільнасці з ужываннем расейскага спецназа (дыверсантаў).
2. Уварванне пад выглядам правядзення «міратворчай аперацыі» з мэтай авалодання Днепрапятроўскам (галоўнае), Адэсай і Кіевам, акупацыя адпаведных тэрыторый Украіны», - адзначыў былы намеснік начальніка Генштаба Узброеных сіл Украіны.
«Усё гэта будзе суправаджацца інфармацыйна-псіхалагічнай аперацыяй, накіраванай на нашых вайскоўцаў і насельніцтва», - падкрэсліў Кабаненка.
Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый у гарадах усходніх абласцей Украіны. Журналісты заходніх СМІ паведамлялі, што сярод баевікоў прысутнічаюць і беларусы.
У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку. 24 красавіка ўкраінская армія пачала вызваленне Славянска.