Дэпутат Дзярждумы патрабуе забараніць «Ляпісаў» у Расеі
33- 28.04.2014, 8:00
- 22,190
Парламентарый пакрыўдзіўся на словы пра «імперскіх імбецылаў».
Дэпутат Дзярждумы Раман Худзякоў (ЛДПР) накіраваў зварот генпракурору Расеі Юрыю Чайцы з просьбай праверыць выказванні саліста беларускага гурта «Ляпіс Трубяцкога» на канцэрце, які, паводле яго слоў, праходзіў у Іжэўску. Парламентарыю не спадабаліся словы Сяргея Міхалка «Слава Украіне» і выказванне пра «імперскіх імбецылаў», пішуць «Известия».
Паводле слоў дэпутата, «трэба забараніць гэтай групе наогул выступаць на эстрадзе» у Расеі.
Асцярожна, ненарматыўная лексіка
«Мы <...> просім пакараць яго па ўсёй строгасці закона. Бо гэта як мінімум нецэнзурная лаянка ў грамадскім месцы. Хай пракуратура разбіраецца, якое ў яго грамадзянства, магчыма, ён стане персонай нон-грата для Расеі», – прыводзіць выданне словы дэпутата з яго звароту да генпракурора.
Дэпутат тут жа адзначае, што лідар гурта Сяргей Міхалок – грамадзянін Беларусі, а ў Маскве ён нібыта «хаваецца ад пракурорскай праверкі, якая праводзіцца ў дачыненні да яго беларускай Генеральнай пракуратурай». У звароце Худзякова таксама падкрэсліваецца, што спявак «не раз заяўляў аб сваёй падтрымцы Майдана».
Пры гэтым, як піша выданне, прэс-аташэ гурта Аляксандр Бергер пасля канцэрту заявіў, што не бачыць падстаў расцэньваць выказванні Міхалка як абразлівыя. «Ад імя групы «Ляпіс Трубяцкі» хачу папрасіць прабачэння ў імбецылаў, а таксама родных і блізкіх людзей, якія жывуць з гэтай цяжкай хваробай. Мы не хацелі іх пакрыўдзіць», – прыводзіць газета ягоныя словы.
Аднак прадзюсар гурта Яўген Калмыкоў ў размове з выданнем зняпраўдзіў інфармацыю пра тое, што інцыдэнт адбыўся ў Расеі. «Мы не разумеем, што адбываецца, таму што ў Іжэўску не было такога. Гэта не з Іжэўска. Гэта з Германіі, дзе Міхалку фашысты зігавалі, потым паказалі непрыстойныя жэсты», – сказаў ён.
У сярэдзіне сакавіка стала вядома, што Міхалок абвясціў аб роспуску групы «Ляпіс Трубяцкі» з 1 верасня. Раней камуністы Пскоўскай вобласці заклікалі адмяніць канцэрт у Пскове ў сувязі з тым, што Міхалок падчас выступаў на Еўрамайдане «падтрымаў дзяржаўны пераварот на Украіне». Канцэрт у выніку быў скасаваны. Таксама ў сакавіку канцэрт гурта быў скасаваны ў Цюмені.