Будынак міліцыі ў Луганску абстрэльваюць з аўтаматаў
11- 29.04.2014, 19:40
- 18,715
Захопнікі будынка прымусілі напісаць рапарт аб звальненні начальніка УМУС Уладзіміра Гуслаўскага.
Ваяўнікі пачалі штурмаваць з ужываннем святлогукавых гранат і стралковай зброі будынак Луганскай абласной управы МУС Украіны, паведамляе «Корреспондент». Блізу паўтысячы названых асоб падышлі да будынка МУС з патрабаваннем адправіць у адстаўку начальніка УМУС Уладзіміра Гуслаўскага. Яны накіравалі ў будынак ініцыятыўную групу для перамоў.
Крыху пазней некалькі чалавек выйшлі і паведамілі, што Гуслаўскі пагадзіўся напісаць рапарт аб звальненні. Аднак натоўп далей стаяў перад будынкам.
Праз пэўны час нехта з натоўпу кінуў гранату ў бок будынку МУС, у адказ з будынка МУС таксама паляцелі святлогукавыя гранаты.
Пасля гэтага да будынка прыбылі блізу 20 невядомых асобаў, узброеных аўтаматычнай зброяй. Яны распачалі агонь у паветра, аднак некаторыя страляюць па вокнах будынка МУС.
Нагадаем, раней былі захопленыя будынкі Луганскай аблдзяржадміністрацыі і пракуратуры.