Парашэнка прапануе падаць на Газпром у Стакгольмскі суд

Кандыдат у прэзідэнты звярнуўся ў Кабмін з ініцыятывай пачаць судовы працэс супраць расейскага манапаліста аб скасаванні газавага пагаднення 2009 года.

Украінскі ўрад павінен абавязаць НАК Нафтагаз падаць пазоў у Стакгольмскі арбітраж з патрабаваннем скасаваць кантракт 2009 года з Газпромам, калі расейцы неадкладна не пагодзяцца перагледзець умовы газавага пагаднення.

З такой ініцыятывай у Кабінет міністраў Украіны звярнуўся народны дэпутат, кандыдат у прэзідэнты Пётр Парашэнка пасля таго, як расейскі ўрад пастанавіў скасаваць «нулявую мыту на газ для Украіны», або так званую «харкаўскую зніжку», паведаміла прэс-служба палітыка.

Паводле ягоных слоў, абвешчаны кошт ў суме 485 даляраў (за тысячу кубаметраў, - рэд.) негатыўна ўплывае на ўкраінскую эканоміку, зніжае канкурэнтаздольнасць айчынных тавараў на замежным і ўнутраным рынках, прымушае надалей падвышаць кошт газу для хатніх гаспадарак і цеплакамунэнэрга.

Умовы кантракту 2009, адзначыў Парашэнка, не адпавядаюць рынкавым рэаліям, якія склаліся на еўрапейскім рынку. Сам кантракт падпісваўся ва ўмовах грубага ціску і шантажу Расеі ў дачыненні да Украіны і Еўразвязу.

Парашэнка думае, што, мяркуючы з нярэдкіх прэцэдэнтаў, у Нафтагаза ёсць усе шанцы перамагчы ў судовым працэсе. Ён нагадаў, што еўрапейскія кампаніі атрымлівалі такім чынам істотныя зніжкі ад Газпрома. Часам расейскі манапаліст згаджаўся на іх, каб пазбегнуць непасрэдных судовых разглядаў. Напрыклад, нагадаў дэпутат, у 2012 годзе польская газавая кампанія PGNiG дамаглася ад «Газпрома» зніжкі да 15% без якіх-небудзь палітычных умоў - ды яшчэ і прамінулай датай.

«У цяперашніх умовах, - мяркуе Парашэнка, - калі Расея і яе вядучыя кампаніі знаходзяцца пад пагрозай яшчэ больш глыбокіх эканамічных санкцый з боку ЕЗ, а нашая прававая пазіцыя з'яўляецца абгрунтаванай і бездакорнай, самы час дамагчыся справядлівасці ў незалежным судзе».

Нагадаем, сёння кіраўнік расейскага Газпрома Аляксей Мілер на сустрэчы з прэм'ерам РФ Дзмітрыем Мядзведзевым заявіў, што кошт газу для Украіны з красавіка падвышаецца да $485 за тысячу кубаметраў.

1 красавіка той жа Мілер афіцыйна заяўляў пра падвышэнне кошту газу да $385,5 за тысячу кубаметраў. Такі рост быў звязаны са скасаваннем зніжкі, якая дзейнічала ў першым квартале, што дазваляла Украіне набываць энэргарэсурсы па $268,5. Прычына скасавання зніжкі - «невыкананне ўкраінскай стараной абавязанняў у сплаце запазычанасці за пастаўкі газу ў 2013 годзе і адсутнасць стоадсоткавай аплаты паставак», казаў Мілер.