Сепаратысты ў Луганску паранілі вядомага адваката
4- 30.04.2014, 10:50
- 7,417
Луганскія сепаратысты цяжка паранілі прэзідэнта адвакацкай кампаніі "Чудоўскі і партнёры" Ігара Чудоўскага.
Дадзеную інфармацыю Укрінфарм пацвердзіла па тэлефоне яго жонка, адвакат Ірына.
"Куля прайшла праз бок, прабіла лёгкае, грудную клетку і зачапіла шчаку. Муж страціў шмат крыві. Ён праапераваны, яго стан стабільна цяжкі", - удакладніла Ірына.
Паводле яе слоў, 29 красавіка некалькі баевікоў у масках і з аўтаматамі Калашнікава выкралі Ігара Чудоўскага з офіса.
Сепаратысты пасадзілі яго за руль яго ж машыны і пад прыцэлам аўтаматаў павезлі ў абласную тэлерадыёкампанію. Па папярэдніх дадзеных, яны хацелі прымусіць Чудоўскага правесці з імі прэс-канферэнцыю, аднак ён адмовіўся і паспрабаваў выскачыць з машыны. Баевікі ўжылі зброю.
На пытанне Ірыны "Навошта трэба было страляць у бяззбройнага чалавека", адзін з баевікоў сказаў: "А чаго ён тузаўся?".
Чудоўскі - актыўны прыхільнік еўраінтэграцыі Украіны, уваходзіць у лік членаў "Савета грамадскага кантролю над дзейнасцю праваахоўных органаў Луганскай вобласці".
Спецыялісты кампаніі займаліся юрыдычным суправаджэннем і кансультаваннем прадпрымальнікаў, якія вядуць бізнес з краінамі ЕЗ у рамках Пагаднення аб асацыяцыі.