Улады больш не кантралююць сітуацыю ў Данбасе
42- 30.04.2014, 12:17
- 37,505
У гэтым гэтым прызнаўся в.а. прэзідэнта Украіны.
Цэнтральная ўлада не кантралюе сітуацыю ва ўсходняй Украіне. Пра гэта на нарадзе з губернатарамі ў Кіеве заявіў в.а. прэзідэнта краіны Аляксандр Турчынаў.
"Улада не кантралюе сітуацыю... Я хачу сказаць сумленна. Сёння сілавыя структуры не ў стане ўзяць пад кантроль сітуацыю ў Данецкай і Луганскай абласцях", - цытуе Турчынава ЛІГАБізнесІнформ.
Паводле яго слоў, спробы дэстабілізаваць сітуацыю зафіксаваныя таксама ў шэрагу іншых рэгіёнаў - у прыватнасці, у Харкаўскай, Днепрапятроўскай, Херсонскай, Адэскай, Нікалаеўскай, Запарожскай абласцях.
Турчынаў дадаў, што часу няма, і цяпер галоўная задача праваахоўных органаў - не дапусціць распаўсюджвання тэрарыстычнай пагрозы на гэтыя рэгіёны. Паводле яго слоў, новага піку правакацый улада чакае на травеньскія святы.
Нагадаем, учора, 29 красавіка, Турчынаў запатрабаваў звольніць з займаных пасадаў кіраўнікоў абласных упраўленняў МУС Луганскай і Данецкай абласцей.
"Будуць звольненыя ўсе прадстаўнікі сілавых структур на месцах, якія не здольныя выконваць свае прафесійныя абавязкі. Тыя так званыя "праваахоўнікі", якія здрадзілі Украіне і пачалі супрацоўнічаць з тэрарыстамі, будуць адказваць перад законам", - паабяцаў Турчынаў.
Заява была выкліканая актывізацыяй сепаратыстаў у Луганскай вобласці, якія пачалі захопліваць адміністрацыйныя будынкі. У прыватнасці, учора сепаратысты ўзялі штурмам будынак абласнога глаўка пракуратуры і будынак абласной дзяржаўнай тэлерадыёкампаніі. Таксама сепаратысты спрабавалі штурмаваць будынак абласнога ўпраўлення МУС.
В.а. кіраўніка дзяржавы таксама мае намер правесці пасяджэнне Вярхоўнай Рады 6 траўня, на якім будуць заслуханыя прадстаўнікі Мінабароны, МУС і СБУ.
У цяперашні час ва Украіне праводзіцца антытэрарыстычная аперацыя пры ўдзеле Узброеных Сіл.