The Wall Street Journal: Новая хваля санкцый можа быць бліжэй, чым чакаецца

У сталіцах краін ЕЗ абмяркоўваецца план сустрэчы кіраўнікоў МЗС для дыскусіі аб узмацненні жорсткасці санкцый.

Пра гэта піша The Wall Street Journal (пераклад - Инопресса), спасылаючыся на чыноўнікаў нацыянальных урадаў. "Магчыма, новая хваля санкцый бліжэй, чым чакаюць многія аналітыкі", - мяркуе выданне.

У той жа час апошні раўнд санкцый супраць Расеі адлюстроўвае трансатлантычныя нязгоды адносна найбольш эфектыўнага спосабу пакарання Масквы за дэстабілізацыю сітуацыі ва Украіне. Узніклі пытанні, ці дастаткова жорстка дзейнічае Еўропа, гаворыцца ў артыкуле.

"У аўторак ЕЗ апублікаваў чарговы спіс, распаўсюдзіўшы яшчэ на 15 чалавек замарожванне рахункаў і забарону на выдачу віз, - адзначае выданне. - Але блок адмовіўся прымаць меры супраць якіх-небудзь кампаній, буйных бізнесменаў або важных сектараў расейскай эканомікі".

"ЗША, наадварот, у панядзелак замарозілі рахункі 17 кампаній, звязаных з фінансавым атачэннем прэзідэнта Уладзіміра Пуціна, і абцяжарылі для іх атрыманне вырабленых у ЗША тавараў. Вашынгтон таксама ўскладніў амерыканскім экспарцёрам атрыманне дазволу на продаж высокатэхналагічных тавараў, якія могуць спатрэбіцца расейскай арміі", - паведамляе выданне.

''У Еўропы зусім іншыя стасункі з Расеяй, чым у ЗША, - адзначае Штэфан Майстэр з Еўрапейскай рады па міжнародных адносінах. - Яна знаходзіцца ў значна большай эканамічнай узаемазалежнасці з Расеяй".

"Падобныя перашкоды могуць толькі вырасці, паколькі дыскусія пераходзіць да санкцый, накіраваных супраць важных сектараў расейскай эканомікі, такіх як банкаўскі і энергетычны, што еўрапейцы называюць трэцяй фазай. ЗША - гэта адна краіна, а ЕЗ складаецца з 28 дзяржаў, у кожнай з якіх свае інтарэсы і свая палітыка", - разважае выданне.

Напрыклад, Бельгія з'яўляецца цэнтрам гандлю алмазамі і баіцца страціць доступ да расейскіх алмазаў. У Францыі абаронныя кампаніі непакояцца з-за кантрактаў з расейскай арміяй адзначае WSJ.

"Гэта не будуць колькі-небудзь сур'ёзныя санкцыі (трэцяй фазы), таму што краіны-члены ЕЗ не могуць прыйсці да пагаднення паміж сабой, і рускія гэта ведаюць, - сцвярджае Майстэр. - У нас у Еўропе ўсё яшчэ (эканамічны) крызіс, і кожная краіна будзе пераследваць свае інтарэсы, і ў кожнай краіны ёсць права вета".

Такім чынам, захоўваюцца сумневы ў тым, ці прымяняе ЕЗ эфектыўна нават тыя санкцыі, якія ўжо ўвёў.