Херман ван Рампей: ЕЗ узмоцніць ціск на Расею

Усе краіны ЕЗ падтрымліваюць Украіну і гатовыя дапамагчы ёй фінансава.

Сітуацыя ў гэтай краіне працягвае выклікаць вялікую заклапочанасць, і ў адсутнасці прагрэсу на шляху да перамоўнага рашэння ЕЗ будзе ўзмацняць ціск на Расею. Пра гэта заявіў старшыня Еўрапейскай Рады Херман ван Рампей, паведамляе «Інтэрфакс-Украіна».

«Гвалту і беззаконню ва Усходняй Украіне трэба тэрмінова пакласці канец», - падкрэсліў кіраўнік Еўрарады.

Ён паабяцаў, што «ў адсутнасці якога-небудзь прагрэсу на шляху да перамоўнага рашэння, Еўрапейскі звяз будзе настойваць, і, калі гэта неабходна, узмацняць ціск на Расею».

«Усе краіны Еўрапейскага звяза падтрымліваюць Украіну як партнёра і гатовыя дапамагчы краіне фінансава, а таксама дапамагчы ажыццявіць многія неабходныя палітычныя і эканамічныя рэформы на карысць украінскага народа і ўсіх яго суседзяў», - таксама падкрэсліў Рампей.

Раней санкцый супраць Расеі, уведзеныя Еўразвязам і ЗША ў сувязі з канфліктам ва Украіне, падтрымала канцлер Германіі Ангела Меркель.