З Менска ў Вільню - на новым цягніку

З 1 траўня па маршруце Менск-Вільня будуць курсіраваць трохвагонныя дызель-цягнікі.

Новыя склады заменяць звыклыя рыжскія дызель-цягнікі, якімі абслугоўваецца цягнік N15/16 Менск-Вільня, паведамілі агенцтву "Інтэрфакс-Захад" у прэс-цэнтры БЧ.

Расклад руху цягнікоў N15 і N16, а таксама парадак правядзення памежнага і мытнага кантролю застануцца ранейшымі. Па выходных і святочных днях пры павелічэнні пасажырапатоку цягнік N15/16 будзе накіроўвацца здвоеным складам польскіх дызель-цягнікоў.

Усе квіткі на новыя цягнікі прадаюцца па кошце другога класа - 224 тыс. рублёў (да 1 траўня на цягнік № 15/16 Менск-Вільня можна набыць квіткі па кошце першага, другога і трэцяга класа).

Машыністы, якім трэба будзе працаваць на новых дызель-цягніках, ужо прайшлі тэарэтычны курс навучання ў Польшчы. У цяперашні час у Беларусі яны праходзяць практычнае навучанне навыкам кіравання новай тэхнікай.

У гэтых дызель-цягніках прадугледжана 145 месцаў для сядзення. Даўжыня цягніка складае 69,3 м, канструкцыйная хуткасць руху - 140 км/г.

Да паслуг пасажыраў прадстаўленыя прасторныя салоны, мяккія крэслы з індывідуальнымі рэгуляваннямі паставы спінкі і падлакотнікаў, паніжаная падлога (600 мм), якая дазваляе хутка ажыццяўляць пасадку і высадку. У кожным вагоне ўсталяваная сістэма кандыцыянавання паветра, прылада цеплавых завес уваходных дзвярэй, якое перашкаджае паступленню халоднага паветра звонку і выхаду цёплага паветра з салонаў. Дзверы ў салон абсталяваныя высоўнымі прыступкамі. Для пасадкі і высадкі пасажыраў з абмежаванымі фізічнымі магчымасцямі прадугледжаныя адкідныя трапы. У цягніку ўсталяваныя два туалетных комплекса вакуумнага тыпу, адзін з якіх прыстасаваны для пасажыраў з абмежаванымі фізічнымі магчымасцямі.