Барозу: Расея пагражае ўсяму свету
25- 1.05.2014, 20:51
- 23,188
Старшыня Еўрапейскай камісіі заявіў, што асудзіць дзеянні Расеі і дапамагчы Украіне павінен увесь свет.
Жазэ Мануэл Барозу назваў сітуацыю ва Украіне "самай вялікай пагрозай стабільнасці і бяспецы ў Еўропе пасля руйнавання Бэрлінскага муру", паведамляе "Інтэрфакс".
"Цяперашнія падзеі пачаліся пасля таго, як народ Украіны выказаў выяўнае жаданне ўзяць сваю будучыню ва ўласныя рукі і зблізіцца з Еўрапейскім Звязам, падпісаўшы пагадненне, якое звяжа іх палітычнай асацыяцыяй і эканамічнай інтэграцыяй", - сказаў Барозу.
Ён адзначыў, што Расея не прыняла гэты суверэнны выбар Украіны і наважыла ўмяшацца.
"Мы не можам ні прыняць, ні апраўдаць такі тып паводзін. Вось чаму мы хутка адрэагавалі разам з нашымі партнёрамі з "вялікай сямёркі", даўшы зразумець, што гэтыя дзеянні маюць палітычную, дыпламатычную і эканамічную плату. Мы таксама гатовыя падтрымаць Украіну ў яе станаўленні як дэмакратычнай, квітучай і незалежнай краіны", - паабяцаў ён.
"Але гэта не толькі пытанне Еўропы, ЗША ці "вялікай сямёркі". Гэта павінна датычыцца і астатняга свету, бо гаворка ідзе пра дырэктыўную пагрозу міжнароднаму праву і міжнароднаму супакою", - заявіў кіраўнік Еўракамісіі.