Спецназ ГРУ ў Данбасе замяняюць найміты з Расеі
20- 10.05.2014, 10:12
- 26,703
Ва Усходняй Украіне адбываецца замена вайскоўцаў спецназа ГРУ ГШ ВС РФ на наймітаў, якія прыбываюць з Расеі.
Пра гэта паведаміў кіраўнік Цэнтра вайскова-палітычных даследаванняў Дзмітрый Тымчук на сваёй старонцы ў сацыяльнай сетцы «Фэйсбук».
«На працягу як мінімум двух апошніх тыдняў у тэрарыстычных фарміраваннях на ўсходзе мы назіраем паўсюдную замену вайскоўцаў спецназа ГРУ ГШ ВС РФ на наймітаў, якія прыбываюць з Расеі. Гэта, перш за ўсё, вайскоўцы запасу, якія ў сваёй большасці маюць досвед службы ў расейскім спецназе і досвед удзелу ў баявых дзеяннях (у прыватнасці, на Каўказе)», - адзначыў ён.
З ягоных слоў, набор такіх дастаткова прафесійна падрыхтаваных наймітаў расейскія ўлады праводзяць практычна на ўсёй тэрыторыі РФ. Паводле інфармацыі групы Інфармацыйны Супраціў, нават у Хабараўскім краі Расеі на працягу апошніх трох тыдняў у мясцовыя ваенкаматы выклікаюць вайскоўцаў запасу, якія служылі ў спецназе ГРУ, дзе ім прапануецца за добрую плату ў складзе сфармаваных груп прыбыць ва Украіну для ўдзелу ў тэрарыстычнай дзейнасці. Найбольш жа актыўна падобная праца вядзецца ў Паўднёвай федэральнай акрузе РФ.
«Адначасова ідзе магутны працэс перакідання з тэрыторыі Расеі зброі для тэрарыстычных груп на Данбасе», - дадаў Тымчук.
У паўднёва-ўсходніх абласцях Украіны з пачатку сакавіка праходзяць справакаваныя Расеяй акцыі сепаратыстаў. Эпіцэнтрамі хваляванняў сталі абласныя цэнтры і шэраг буйных гарадоў, адміністрацыйныя будынкі, якіх перыядычна бяруць пад кантроль дыверсанты і баевікі. СБУ атрымала доказы, што імі кіруюць прадстаўнікі расейскіх спецслужбаў і ГРУ.