Украiнскiя сілавікі пачалі актыўныя дзеянні ў Данбасе
8- 11.05.2014, 10:04
- 20,468
Антытэрарыстычная аперацыя праходзіць не толькі ў Славянску, але і ў іншых гарадах, захопленых тэрарыстамі.
Пра гэта паведамляе ў сваім акаўнце ў сацыяльнай сетцы «Фэйсбук» кіраўнік украінскага Цэнтра вайскова-палітычных даследаванняў Дзмітрый Тымчук.
«Паводле аператыўных звестак групы «Інфармацыйны Супраціў», на Данбасе пачалася чарговая актыўная фаза АТА. Актыўныя дзеянні сілавікоў ахопліваюць не толькі Славянск, але і іншыя населеныя пункты рэгіёну, дзе акапаліся прарасейскія тэрарысты. На гэты момант кіраўніцтва АТА канстатуе, што пачатковы этап чарговай фазы аперацыі праходзіць паводле плану», - піша ён.
Эксперт дадаў, што «Інфармацыйны супраціў» будзе сачыць за сітуацыяй.
Нагадаем, сёння ноччу тэрарысты атакавалі тэлевежу ў Славянску. Бой паміж імі і байцамі Нацыянальнай гвардыі Украіны ішоў амаль гадзіну. Вежу абстрэльвалі з СТКРСы і кулямётаў. Раніцай атака аднавілася. Двое байцоў Нацыянальнай гвардыі атрымалі раненні.