Лекараў не дапускалі да касіркі гарадзенскага абменніка, якая страціла прытомнасць
30- 11.05.2014, 10:41
- 34,562
Меддапамогу ёй аказалі толькі пасля прыезду работнікаў банка.
Інцыдэнт адбыўся ў гандлёвым цэнтры на вуліцы Кабяка. Падчас аперацыі па абмене валюты касірка раптам страціла прытомнасць, піша «Вячэрняя Гародня».
Дзяўчыне выклікалі хуткую. Але медыкі, якія прыехалі на месца, трапіць у касу не змаглі. Аказалася, праз тое, што грошы знаходзіліся ў адкрытым доступе. Міліцыянты, якія прыбылі, выбіваць выратавальнікам дзверы не дазволілі да прыезду работнікаў банка.
Калі ж касірка прыйшла ў сябе, дзверы яна ўсё роўна не адкрыла. Са слоў відавочцаў, лекары працягвалі заставацца на месцы, каб пераканацца, што жыццю дзяўчыны нічога не пагражае.
Агледзець яе медыкі змаглі праз 10-15 хвілін пасля прыезду прадстаўнікоў банка. Спачатку касірка ўпусціла калегу, і толькі пасля гэтага выйшла да лекараў.