ЗША і Еўропа не прызнаюць «рэферэндум» сепаратыстаў
9- 11.05.2014, 10:59
- 10,225
Вынікі «рэферэндуму», арганізаванага тэрарыстамі пад дуламі аўтамата, не будуць прызнаныя заходнімі краінамі.
Пра тое, што яго правядзенне незаконнае, заявіла прэс-сакратарка Дзяржаўнага дэпартамента ЗША Джэн Псакі, паведамляе «Радыё Свабода».
«Рэферэндум», запланаваны на 11 траўня ва ўсходняй Украіне ўзброенымі групамі сепаратыстаў, паводле ўкраінскага заканадаўства - незаконны, ён з'яўляецца спробай стварыць далейшы падзел і беспарадак. Калі гэты «рэферэндум» адбудзецца, ён будзе парушаць міжнароднае заканадаўства і тэрытарыяльную цэласнасць Украіны. ЗША не будуць прызнаваць вынікі незаконнага «рэферэндуму», - заявіла прэс-сакратарка знешнепалітычнага ведамства ЗША.
Джэн Псакі таксама адзначыла расчараванне Вашынгтонам дзеяннямі расейскіх уладаў, якія «не выкарыстоўвалі свой уплыў для таго, каб прадухіліць правядзенне «рэферэндуму». У Дзярждэпартаменце ЗША дадалі, што расейскія войскі і далей знаходзяцца ля мяжы з Украінай. У Вашынгтоне заклікаюць Расею «выбраць шлях імплементацыі Жэнеўскіх дамоўленасцяў».
Прызначаны прарасейскімі актывістамі на 11 траўня «рэферэндум» на ўсходзе Украіны з'яўляецца нелегітымным, і яго правядзенне прывядзе да далейшага абвастрэння сітуацыі ў гэтай краіне. Пра гэта заявіла раней Мая Качыянчыч, прэс-сакратарка кіраўніка знешнепалітычнага ведамства ЕЗ Кэтрын Эштан.
Напярэдадні з заклікам да прарасейскіх сепаратыстаў адмяніць правядзенне «рэферэндуму» ў Данбасе выступіла парламенцкая асамблея АБСЕ.