Інструктара аўташколы будуць судзіць за хабар даішнікам

Справа разглядаецца ў судзе Салігорскага раёна Менскай вобласці.

На лаве падсудных двое: майстар вытворчага навучання і намеснік дырэктара мясцовай аўташколы.

- У ходзе расследавання крымінальнай справы ўстаноўлена, што майстар аўташколы на працягу 2009-2013 гадоў падбухторваў навучэнцаў аўташколы да дачы праз яго хабараў службовым асобам МРЭА ДАІ Салігорскага РАУС за спрыяльнае вырашэнне пытанняў аб здачы іспытаў на права кіравання транспартнымі сродкамі. Такім чынам, уводзячы грамадзян у зман, выкарыстоўваючы падман, і не маючы намеру выконваць свае абяцанні, абвінавачаны ашуканскім шляхам прысвойваў перададзеныя яму грашовыя сродкі, - распавядае «Комсомольской правде в Беларуси» Ларыса Пархімовіч, старшы памочнік пракурора Менскай вобласці па прававым забеспячэнні, інфармацыі і грамадскіх сувязях.

Некаторыя вучні перадавалі майстру 500 тысяч, а іншыя па 400 даляраў. Акрамя таго, супрацоўнік аўташколы прадаў аднаму з вучняў падробленае пасведчанне аб праходжанні падрыхтоўкі кіроўцы. Хоць ведаў, што падапечны не прайшоў у поўным аб'ёме праграму падрыхтоўкі кіроўцы катэгорыі «В» і не здаў унутраны іспыт. Абвінавачаны таксама «заплюшчваў вочы» на факты ненаведвання навучэнцамі заняткаў у аўташколе.

Што ж тычыцца намесніка дырэктара аўташколы, то ён абвінавачваецца ў злоўжыванні службовымі паўнамоцтвамі, службовым падлогу і атрыманні хабару.

- Абвінавачаны з карыслівай і іншай асабістай зацікаўленасці сістэматычна ўносіў загадзя ілжывыя звесткі ў пасведчанні аб праходжанні падрыхтоўкі кіроўцаў, якія выдаюцца навучэнцам па заканчэнні аўташколы, што пасля дазваляла ім здаваць іспыты ў ДАІ на права кіравання транспартнымі сродкамі. Таксама паказаны грамадзянін абвінавачваецца ў атрыманні хабару за спрыяльнае вырашэнне пытання аб здачы тэарэтычнага і практычнага іспытаў у аўташколе, - удакладніла Ларыса Пархімовіч.

Інструктару аўташколы пагражае да 10 гадоў пазбаўлення волі, а намесніку дырэктара - да 7 гадоў.