Менчукі абураныя: Расейцы паркуюцца абы-дзе

Менчукі скардзяцца на парушэнні правілаў паркоўкі аўтамабіляў з нумарамі РФ.

Некалькі фотаздымкаў, на якіх паказаныя парушэнні, размясцілі карыстальнікі форуму onliner.by. Аб'яднаныя здымкі адной тэмай: кіроўцы аўтамабіляў з расейскімі нумарамі паркуюцца абы-дзе. Сярод такіх апынуўся нават Bentley, зарэгістраваны ў Маскве. У Менскай ДАІ падкрэслілі, што ПДР Беларусі датычыцца ўсіх аўтамабілістаў, якія знаходзяцца на тэрыторыі нашай краіны, па-за залежнасці ад рэгістрацыі транспартнага сродку.

Прыпаркаванага другім шэрагам Bentley зафіксаваў на фота фарумчанін petr.uss на вул. Калініна. «Побач з уваходам у краму прыпаркаваўся чыста па-маскоўску, - напісаў карыстальнік форуму. - Адметна тое што: без «аварыйкі» раз, менавіта насупраць уваходу (заўважу ледзь наперадзе і ззаду, што далей ад уваходу ў краму - месцы былі - гэта два, ну і ў краму хадзіў кіроўца, а не пасажыр - гэта тры. Так супала, што кіроўца выйшаў у той момант, калі пад'ехалі даішнікі і нешта крыкнулі ў гучнагаварыцель, тады кіроўца рэціраваўся».

Адзначым, гэта не адзіны факт, заўважаны ў апошнія дні ў Менску.

У Менскай ДАІ падкрэслілі, што недатыкальных кіроўцаў няма, нават на час чэмпіянату свету.

«Супрацоўнікі звяртаюць увагу на парушэнне ўсіх удзельнікаў руху, незалежна ад нумароў дзяржрэгістрацыі, - падкрэслілі ў Дзяржаўтаінспекцыі. - І беларусы, і замежнікі павінны лічыцца з нашымі ПДР, а парушальнікаў чакае адказнасць. Дарэчы, за першыя дні правядзення спартыўнага мерапрыемства грубых парушэнняў і сур'ёзных здарэнняў з удзелам кіроўцаў з-за мяжы зафіксавана не было».